सलग चौथ्या दिवशी पेट्रोल-डिझेलचे भाव खाली

मुंबई : आंतरराष्ट्रीय बाजारात मागील काही दिवसांपासून कच्च्या तेलाच्या किंमतीत घसरण होत असल्याने देशांतर्गत तेल कंपन्यांनी पेट्रोल-डिझेलच्या किंमतीत कपात केली आहे. मागील सलग १५ दिवसात कच्च्या तेलाचे दरात ६ डॉलर प्रति बॅरलने खाली आले आहेत. त्यामुळे भारतात सुद्धा इंधनाच्या दारात अल्पशी दर कपात होत आहे.

देशात आज सलग चौथ्या दिवशी पेट्रोल तसेच डिझेलचे दर खाली आले आहेत. मागील ४ दिवसात पेट्रोलच्या दरात प्रति लिटरमागे १.०९ रुपये आणि डिझेल प्रति लिटर ५० पैशाने स्वस्त झाले आहे.

राजधानी दिल्लीत आज पेट्रोलचे दर प्रति लिटरमागे २५ पैशाने तर डिझेलचे दर प्रति लिटरमागे १७ पैशाने स्वस्त झाले आहेत. त्यामुळे राजधानी दिल्लीत पेट्रोल आणि डिझेलचे दर अनुक्रमे ८१.७४ रुपये आणि ७५.१९ रुपये इतका झाले आहे. तर मुंबई शहरात पेट्रोल प्रति लिटरमागे २५ पैशाने आणि डिझेल प्रति लिटरमागे १८ पैशांनी स्वस्त झाले आहेत. त्यानुसार मुंबईतील आजचे पेट्रोल आणि डिझेलचे दर अनुक्रमे ८७.२१ रुपये आणि ७८.८२ रुपये एवढे झाले आहेत.