मनसेच्या बाबाराजे जाधवरावांच पुरंदरमध्ये शक्तिप्रदर्शन

सासवड : मनसेचे शेतकरी आघाडीचे प्रमुख बाबाराजे जाधवराव यांनी सासवडमध्ये मेळावा घेत शक्तिप्रदर्शन केले. शक्ती प्रदर्शनामार्फत त्यांनी थेट शिवसेनेचे जलसंपदा राज्यमंत्री विजय शिवतारे यांनाच आव्हाहन दिलं आहे.

जर सेनेचे जलसंपदा राज्यमंत्री विजय शिवतारेंनी येत्या महिनाभरात पुरंदर तालुका पंचायत समितीची आमसभा घेतली नाही तर आम्ही त्यांना संपूर्ण तालुक्यात फिरू देणार नाही असा थेट इशाराच मेळाव्यात उपस्थितांना संबोधित करताना दिला. बाबाराजे जाधवरावांच्या सासवडमध्ये शक्ती प्रदर्शन करत विधानसभेचं रणशिंग फुंकल्याची चर्चा पुरंदर मध्ये रंगली आहे.

मी परदेशात असल्याची अफवा विरोधक पसरवत असून त्यात काहीच तथ्य नाही असं स्पष्ट करून बाबाराजे जाधवरावांनी सभेत थेट
पासपोर्टच वरती फडकावून दाखविला. राज्यमंत्री विजय शिवतारे हे केवळ बोलबच्चनगिरी करत असून आणि इथले प्रतिनिधी असून सुद्धा ते जिल्ह्याच्या नियोजन समितीच्या सभेला उपस्थित राहत नसल्याचा आरोप बाबाराजे जाधवरावांनी केला. सासवड तालुक्याची आमसभा ३ वर्षे झालेली नाही आणि येत्या महिनाभरात ती झाली नाही तर शिवतारेंना तालुक्यात फिरू देणार नाही असा इशाराच बाबाराजे जाधवरावांनी सभेत दिला.

याच सभेत शेतकऱ्यांसाठी स्वतंत्र कंपनी स्थापण्याची घोषणा बाबाराजे जाधवरावांनी सभेत केली. तसेच पुरंदरच्या पाणी प्रश्नावर बोलताना बाबाराजे जाधवरावांनी बारामतीवर टीका केली. बाबाराजे जाधवराव म्हणाले की, पुरंदरचे हक्काचे पाणी बारामतीला वर्ग नेण्यात आले परंतु त्याविषयी राज्यमंत्री विजय शिवतारे काहीच बोलले नाहीत असं सुद्धा बाबाराजे जाधवराव म्हणाले.

मनसेचे बाबाराजे जाधवराव पुन्हा जोरदार शक्ती प्रदर्शन करत कार्यरत झाल्याने पुरंदरच्या विधानसभेची चुरस रंगतदार होणार अशी परिस्थिती निर्माण झाली आहे. पश्चिम महाराष्ट्रात मनसे पूर्ण पणे शक्ती पणाला लावत असून स्वतः पक्ष प्रमुख राज ठाकरे यांनी सुद्धा पुण्यावर विशेष लक्ष केंद्रित करून पक्ष विस्तार आणि पक्ष संघटन मजबूत करण्यावर भर दिला आहे.