कानपूर : उत्तर प्रदेशमधील कानपूर येथे हावडा येथून नवी दिल्लीला जात असलेल्या पूर्वा एक्सप्रेस क्रमांक १२३०३ ला शुक्रवारी रात्री जवळपास १ वाजताच्या दरम्यान अपघात झाला आहे. या एक्स्प्रेसचे १२ डबे रुळावरून घसरले आहेत. कानपूरपासून जवळपास १५ किलोमीटर दूरवर असलेल्या रुमा गावाजवळ हा अपघात घडला असून अपघातात १०० हून अधिक प्रवासी जखमी असल्याचे समजते आहे.
दरम्यान अपघाताविषयी माहिती मिळताच रात्री अडीच वाजताच्या सुमारास जिल्हाधिकारी, एसएसपी, ३० अँब्युलन्स, अग्निशमन दलाचे जवान आणि पोलीस घटनास्थळी दाखल झाले. तसेच एनडीआरएफच्या ४५ जणांची फौज घटनास्थळी पोहोचली असून बचावकार्य अद्यापही सुरू आहे.
