CAA आंदोलनं: देश किंवा राज्य सोडावं लागेल ही भीती बाळगू नका : मुख्यमंत्री उद्धव ठाकरे

नागपूर: नागरिकत्त्व सुधारणा कायद्यावरून देशभरात आगडोंब उसळला आहे. महाराष्ट्रातही याचे लोण पसरले असून ठिकठिकाणी आंदोलनं होतं. राज्याचे मुख्यमंत्री उद्धव ठाकरे यांनी राज्यातील सर्व जनतेला शांततेचं आवाहन केलं आहे. तसंच, महाराष्ट्रातील जनतेचे हक्क कुणालाही हिरवून देणार नाही, अशी ग्वाहीही दिली आहे. नागपूर हिवाळी अधिवेशनामध्ये मुख्यमंत्री उद्धव ठाकरे यांनी प्रसारमाध्यमांशी संवाद साधून महाराष्ट्रातील जनतेला आवाहन केलं.

“सर्व समाज, जाती पाती, धर्माच्या बांधवांना भगिनींना मी सांगू इच्छितो की महाराष्ट्र सरकार हे कोणत्याही समाज, धर्माच्या नागरिकांच्या हक्काला धक्का लावू देणार नाही. आपले हक्क या राज्यात अबाधित राहतील.”
-मुख्यमंत्री मा. श्री. उद्धव बाळासाहेब ठाकरे pic.twitter.com/6BWlLWMMI7

— Office of Uddhav Thackeray (@OfficeofUT) December 20, 2019

सुधारित नागरिकत्व कायद्याबद्दल अनेकांच्या मनात भीती आहे. या कायद्याबद्दल अनेक गैरसमजदेखील आहेत. त्यामुळे देशातच गैरसमजाची परिस्थिती निर्माण झाली आहे, असं मुख्यमंत्री म्हणाले. सुधारित नागरिकत्व कायद्याविरोधात राज्यासह देशभरात कित्येकजण रस्त्यावर उतरले आहेत. काही भागांमध्ये हिंसाचाराच्या घटनादेखील घडल्या आहेत. मात्र कायदा आणि सुव्यवस्थेला गालबोट लागेल, अशी कोणतीही कृती नागरिकांनी करू नये, असंआवाहन मी जनतेला करतो, असं मुख्यमंत्र्यांनी म्हटलं. कायदा लागू झाल्यास आपल्याला देश सोडावा लागेल, अशी भीती काहींना वाटते. मात्र कोणीही चिंता करू नये. राज्य सरकार जनतेच्या हितांचं आणि हक्कांचं संरक्षण करण्यास समर्थ आहे, अशी ग्वाही मुख्यमंत्री उद्धव ठाकरेंनी दिली.

“सर्व समाज, जाती पाती, धर्माच्या बांधवांना भगिनींना मी सांगू इच्छितो की महाराष्ट्र सरकार हे कोणत्याही समाज, धर्माच्या नागरिकांच्या हक्काला धक्का लावू देणार नाही. आपले हक्क या राज्यात अबाधित राहतील.”
-मुख्यमंत्री मा. श्री. उद्धव बाळासाहेब ठाकरे pic.twitter.com/84uO8lALwJ

— Office of Uddhav Thackeray (@OfficeofUT) December 20, 2019

सुधारित नागरिकत्त्व कायद्याविरोधात सलग दुसऱ्या दिवशीही देशभरात आंदोलनं सुरु आहेत. महाराष्ट्रातही त्याचे पडसाद उमटले आहेत. परभणीमध्ये बंद आणि मोर्चाचे आयोजन करण्यात आले होते. परभणी, पूर्णा, पालम, मानवत ही चारही शहरं कडकडीत बंद ठेवण्यात आली. दुपारी दोन वाजता इदगाह मैदानावरुन जिल्हाधिकारी कार्यालयापर्यंत मोर्चाही काढण्यात आला. या मोर्चात मोठ्या प्रमाणावर मुस्लीम बांधव सहभागी झाले होते.