शिवसेना युवा नेते भावी मुख्यमंत्री; वरळीत बॅनर्स झळकले

मुंबई: मुंबईसह संपूर्ण राज्याचे लक्ष लागलेल्या वरळी विधानसभा मतदारसंघातून शिवसेनेचे युवा नेते आदित्य ठाकरे मोठ्या मताधिक्यानं निवडून आले. या विजयानंतर शिवसेनेनं सत्तेत समसमान वाटा पाहिजे, अशी भूमिका घेतली असतानाच, आता आदित्य ठाकरे हे महाराष्ट्राचे भावी मुख्यमंत्री असतील, अशी जोरदार चर्चा सुरू झाली आहे. आदित्य यांच्या विजयानंतर त्यांच्या वरळी मतदारसंघात त्यांचे अभिनंदन करणारे बॅनर झळकले असून, ‘महाराष्ट्राचे भावी मुख्यमंत्री’ असा उल्लेख त्यावर करण्यात आला आहे. त्यामुळं आता सत्तेत समान वाटा दिला तर, शिवसेनेचा मुख्यमंत्री होणार का, हे पाहणं औत्सुक्याचं ठरणार आहे.

“शिवसेना युवा नेते भावी मुख्यमंत्री आदित्य ठाकरे यांचे वरळी विधानसभा निवडणुकीत प्रचंड मतानी विजयी झाल्याबद्दल हार्दिक अभिनंदन,” अशा आशयाचे बॅनर्स वरळीत लावणअयात आले आहेत. ठाकरे कुटुंबातील पहिली व्यक्ती निवडणुकीच्या रिंगणात उतरल्यानं अनेक जण त्यांच्या प्रचारासाठी रिंगणात उतरले होते. त्यामुळे अनेकांचं लक्ष या ठिकाणच्या निवडणुकीकडे लागले होते. वरळीचे आमदार सुनील शिंदे, राष्ट्रवादीतून शिवसेनेत आलेले सचिन अहिर, विभागप्रमुख आशिष चेंबूरकर यांनी आदित्य ठाकरेंच्या प्रचाराची धुरा सांभाळली होती.

शिवसेनेला मुख्यमंत्रिपद मिळण्याची शक्यता असल्याच्या चर्चेला जोर आला असतानाच, आदित्य ठाकरे यांचे अभिनंदन करणारे बॅनर त्यांच्या मतदारसंघात झळकले आहेत. विशेष म्हणजे आदित्य यांचा उल्लेख भावी मुख्यमंत्री म्हणून करण्यात आला आहे.

ठाकरे घराण्यातील पहिलाच उमेदवार विधानसभेच्या रिंगणात उतरला होता. शिवसेनेचा बालेकिल्ला समजल्या जाणाऱ्या विधानसभेच्या वरळी मतदारसंघातून आदित्य ठाकरे निवडणुकीच्या रिंगणात उतरले होते. यामुळे राज्यासह संपूर्ण देशाचे लक्ष वरळीतील निकालाकडे लागले होते. आदित्य ठाकरे यांना विजयी करण्यासाठी संपूर्ण शिवसेना कामाला लागली. वरळीचे आमदार सुनील शिंदे, राष्ट्रवादीतून शिवसेनेत आलेले सचिन अहिर, विभागप्रमुख आशिष चेंबूरकर यांनी आदित्य ठाकरेंच्या प्रचाराची धुरा सांभाळली.