डोंबिवली: एमआयडीसी फेस २ मधील मेट्रो पोलिटीन केमिकल कंपनीला भीषण आग

डोंबिवली: डोंबिवली एमआयडीसी फेस २ मधील मेट्रो पोलिटीन या केमिकल कंपनीमध्ये भीषण आग लागली. या कंपनीत मोठ्या प्रमाणात केमिकलचा साठा आहे. आगीमुळे केमिकलच्या ड्रममध्येही सतत स्फोट सुरु आहेत. अग्निशमन दलाच्या १२ गाड्या आग विझवण्याचे प्रयत्न करत आहे. या आगीनंतर या कंपनीतील आणि आजूबाजूच्या कंपन्यांमधील कर्मचाऱ्यांना सुखरुप बाहेर काढण्यात आले आहे. अग्निशमन दलाचे अधिकारी आणि कर्मचारी आग विझविण्याचे प्रयत्न सुरु आहेत.

सुरुवातीला आगीची तीव्रता कमी होती. मात्र, त्यानंतर एकापाठोपाठ एक स्फोट होऊ लागले. स्फोटांच्या आवाजानं परिसरात घबराट पसरली. काही वेळानं आग अधिकच भडकली. त्यामुळं या कंपनीसह आसपासच्या कंपनीतील कर्मचारी सुरक्षित ठिकाणी गेले. या घटनेत अद्याप कोणीही जखमी किंवा जीवितहानी झाली नाही, असं सांगितलं जात आहे.

दरम्यान, मागील २ तासांपासून अग्निशमन दलाच्या गाड्या आगीवर नियंत्रण मिळविण्यासाठी शर्थीचे प्रयत्न करत आहेत. संपूर्ण परिसरात काळा धूर पसरला आहे. कंपनीत केमिकल साठा असल्याने आगीवर नियंत्रण मिळवणे कठीण आहे. अद्याप घटनेत कोणी जखमी आहे की नाही ते स्पष्ट झाले नाही. कंपनीत नेमकी आग कशामुळे लागली हे आताच सांगता येणार नाही, सध्याच्या प्राथमिक माहितीनुसार जीवितहानी नाही, पूर्णपणे माहिती घेणे, आग नियंत्रणात आणण्याचे काम सुरू आहे अशी माहिती केडीएमसीचे अग्निशमन अधिकारी दिलीप गुंड यांनी दिली आहे.

Web Title: Story fire breaks out at metropolitan industries Dombivli MIDC.