मुंबई : पगारवाढ तसेच इतर प्रलंबित मागण्यांसाठी संपावर गेलेल्या बेस्ट कामगारांच्या जानेवारी महिन्याच्या पगारात वाढ झाली. परंतु, दुसऱ्या बाजूला बेस्ट प्रशासनाने कामगारांचा संपकाळातील ९ दिवसांचा पगार कापला आहे. प्रशासनाच्या या निर्णयामुळे कामगारांमध्ये प्रचंड नाराजी पसरली आहे.
दरम्यान, बेस्ट कामगारांना आज जानेवारी महिन्याच्या वेतनाची रीतसर स्लिप मिळाली. त्यात पगारवाढ झाल्याचे दिसून आल्यामुळे कर्मचारी देखील सुखावला. परंतु, त्याचवेळी दुसऱ्याबाजूने संपकाळातील पगार एकूण पगातून वजा केल्याने कर्मचार्‍यांचा राग अनावर झाल्याचे पाहायला मिळाले. बेस्ट कामगारांच्या पगारात सरासरी ३ ते ४ हजार रुपयांची एकूण वाढ झाली आहे. परंतु, जानेवारी महिन्याचा पगार हा अवघ्या २२ दिवसांचा आला आहे. संपकरी कामगारांच्या सुट्ट्या मंजूर करण्यात येऊ नयेत. त्यांचे वेतन कापण्यात यावे, अशी सूचना बेस्टच्या अधिकार्‍यांनी संबंधितांना केली होती. त्यानुसारच हे वेतन कापण्यात आले आहे, असे बोलले जात आहे. संपकाळातील सुट्टी मंजूर केली असती तर प्रशासनाविरुद्धचा कामगारांचा आक्रोश कमी झाला असता.
