मुंबई: राज्यात एनसीपी विरोधी पक्षात बसणार आहे. तसंच एनसीपी सक्षम विरोधी पक्षाची भूमिका बजावेल, असं स्पष्टीकरण एनसीपीचे नेते प्रफुल्ल पटेल यांनी दिलं आहे. सरकार स्थापनेत आमची कोणतीही भूमिका नसेल. भारतीय जनता पक्ष-शिवसेनेला कौल मिळाला आहे, त्यांना आमच्या शुभेच्छा आहेत, असंही प्रफुल्ल पटेल म्हणाले.

प्रफुल्ल पटेल यांनी हे वक्तव्य केल्याने आता राजकीय वर्तुळात विविध चर्चांना पुन्हा एकदा उधाण आलं आहे. कारण शरद पवार यांनी सक्षम विरोध काय असतो हे निवडणुकीच्या प्रचारात दाखवून दिलं. त्याचंच प्रतिबिंब हे निकालात उमटल्याचं पाहण्यास मिळालं. आता शिवसेनेला सोबत घेतल्याशिवाय भारतीय जनता पक्षाला सत्ता स्थापणं कठीण आहे. अशात शरद पवार काही भूमिका घेणार का? अशा प्रश्नांवर चर्चा सुरु असतानाच प्रफुल्ल पटेल यांनी सत्ता स्थापनेत एनसीपी किंवा काँग्रेस कोणतीही भूमिका घेणार नाही विरोधात बसणार हे स्पष्ट केलं आहे.

राष्ट्रवादी विरोधी पक्षात बसणार: प्रफुल्ल पटेल