Tata Technologies IPO | टाटा समूहाचा भाग असलेल्या टाटा टेक्नॉलॉजी कंपनीचा आयपीओ 22 नोव्हेंबर 2023 ते 24 नोव्हेंबर दरम्यान गुंतवणुकीसाठी खुला केला जाणार आहे. तब्बल 20 वर्षांनंतर टाटा समूह आपला IPO शेअर बाजारात लाँच करणार आहे. टाटा समूहाने आपला शेवटचा IPO 2004 साली TCS कंपनीचा लाँच केला होता.
टाटा टेक्नॉलॉजी ही कंपनी टाटा मोटर्स कंपनीची उपकंपनी म्हणून ओळखली जाते. मात्र आता टाटा समूहाने ही कंपनी स्वतंत्रपणे सूचीबद्ध करण्याचा निर्णय घेतला आहे. या शेअरची प्राईस बँड 475 रुपये ते 500 रुपये अशी निश्चित करण्यात आली आहे.
या कंपनीचा IPO पूर्णपणे ऑफर फॉर सेल अंतर्गत लाँच करण्यात येईल. IPOअंतर्गत टाटा टेक्नॉलॉजी कंपनी आपले 9 कोटी 57 लाख इक्विटी शेअर्स म्हणजेच जवळपास 23.6 टक्के भाग भांडवल खुल्या बाजारात विकणार आहे. हे समभाग टाटा मोटर्स, अल्फा टीसी होल्डिंग्ज आणि टाटा कॅपिटल ग्रोथ फंड यांच्या द्वारे विकले जाणार आहेत.
सध्या टाटा टेक्नॉलॉजी कंपनीच्या प्रवर्तक गटाने कंपनीचे 76.7 टक्के भाग भांडवल धारण केले आहे. कंपनीच्या गैर-प्रवर्तक गटाने या कंपनीचे एकूण 23.3 टक्के भाग भांडवल धारण केले आहे. IPO नंतर कंपनीच्या प्रवर्तक गटाचा वाटा 56.7 टक्के होईल.
टाटा टेक्नॉलॉजी कंपनीमध्ये नॉन-प्रमोटर ग्रुपने एकूण 43.3 टक्के भाग भांडवल धारण केले आहे. या कंपनीने मार्च 2023 मध्ये IPO साठी कागदपत्रे सेबीकडे सादर केली होती. 27 जून रोजी SEBI ने कंपनीच्या IPO ला मंजुरी दिली होती. टाटा टेक्नॉलॉजी ही टाटा मोटर्सची उपकंपनी जागतिक अभियांत्रिकी सेवा प्रदान करण्याचा व्यवसाय करते. ही कंपनी उपकरण उत्पादकांना उत्पादन विकास आणि टर्नकी सोल्यूशन्ससह डिजिटल सोल्यूशन्स सेवा प्रदान करण्याचे काम करते. टाटा टेक्नॉलॉजी कंपनी वाहतूक, एरोस्पेस आणि अवजड यंत्रसामग्री यासारख्या उद्योगामध्ये गुंतलेल्या कंपन्यांना सेवा प्रदान करण्याचे काम करते.
टाटा टेक्नॉलॉजी कंपनीबाबत सकारात्मक बाब म्हणजे, या कंपनीवर कोणतेही कर्ज नाही. आर्थिक वर्ष 2023-24 मध्ये टाटा टेक्नॉलॉजी कंपनीने 25 टक्क्यांच्या वाढीसह 4,418 कोटी रुपये महसूल संकलित केला आहे. तर कंपनीने 63 टक्क्यांच्या वाढीसह 708 कोटी रुपये निव्वळ नफा कमावला आहे. आर्थिक वर्ष 2021-23 मध्ये, या कंपनीने महसुल चक्रवाढ वार्षिक वाढ दर 30 टक्के नोंदवला आहे.
कंपनीचा EBITDA CAGR 46 टक्के आणि PAT CAGR 61.5 टक्के नोंदवला गेला होता. ऑक्टोबर 2023 मध्ये टाटा मोटर्स कंपनीने आपले टाटा टेक्नॉलॉजी कंपनीमधील 9.9 टक्के शेअर विकले होते. यासाठी टाटा टेक्नॉलॉजी कंपनीचे मूल्यांकन 16,300 कोटी रुपये करण्यात आले होते.
मीडिया रिपोर्ट्सनुसार टाटा टेक्नॉलॉजी कंपनीचे 9 टक्के भाग भांडवल टीपीजी राइस क्लायमेट एसएफ पीटीईने खरेदी केले आहे. टीपीजी राइस क्लायमेट एसएफ पीटीईने यापूर्वीच टाटा मोटर कंपनीच्या इलेक्ट्रिक मोबिलिटी युनिटमध्ये आधीच 1 बिलियन डॉलर्सची गुंतवणूक केली होती. याशिवाय उर्वरित हिस्सा रतन टाटा एंडोमेंटने खरेदी केल्याची बातमी समोर आली आहे.
या शेअर विक्रीपूर्वी टाटा मोटर्स कंपनीने टाटा टेक्नॉलॉजी कंपनीचे एकूण 74.69 टक्के भाग भांडवल धारण केले होते. सप्टेंबर तिमाहीत टाटा मोटर्स कंपनीवर एकूण 38700 कोटी रुपये कर्ज आहे. मागील वर्षी याच तिमाहीत टाटा मोटर्स कंपनीवर 41700 कोटी रुपये कर्ज होते. 2024 मध्ये टाटा मोटर्स कंपनीने आपला देशांतर्गत व्यवसाय पूर्णपणे कर्जमुक्त करण्याचे ठरवले आहे.
महत्वाचं : म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.
