मुंबई : आगामी लोकसभा निवडणुकीच्या अनुषंगाने शिवसेनेची आज शिवसेना भवनमध्ये महत्वाची बैठक आयोजित करण्यात आली आहे. स्वतः शिवसेना प्रमुख उद्धव ठाकरे यांनी ही बैठक बोलावली असून सर्व नेतेमंडळींना उपस्थित राहण्याचे आदेश देण्यात आले आहेत.
अगदी लवकरच येऊ घातलेल्या लोकसभा तसेच विधानसभा निवडणुकीच्या पार्श्वभूमीवर मुंबईतील सर्व खासदार, आमदार, नगरसेवक, विभागप्रमुख, उपविभाग प्रमुख, महिला आघाडी तसेच शिवसेनेशी संबंधित सर्व कामगार संघटनांच्या प्रतिनिधींना बैठकीस उपस्थित राहण्याचे आदेश देण्यात आले आहेत.
कालच मुंबईमध्ये राष्ट्रवादी काँग्रेस पक्षाची महत्वाची बैठक पार पडली होती. त्यानंतर राष्ट्रवादीचे सर्वेसेवा शरद पवार यांनी पुढील वर्षाच्या फेब्रुवारी किंवा मार्च’मध्येच लोकसभा तसेच विधानसभा निवडणूक होण्याचे संकेत दिल्याने सर्वच पक्षात घडामोडी घडण्यास सुरुवात झाल्याचे दिसत आहे.
