नवी दिल्ली, १ जुलै : भारत चीन मधील संघर्षामुळे अनेक चिनी app रडारवर होते. चिनी app वरून भारतीयांची माहिती चोरली जात असल्याचे समोर आल्यानंतर भारतीय गुप्तचर संस्थेनेही या app वर बंदी आणण्याची मागणी केली होती. त्या पार्श्वभूमीवर भारताने चीनवर थेट डिजिलट स्ट्राईक करण्याचा निर्णय घेतला आहे. मोदी सरकारनं सोमवारी टिकटॉकसह ५९ चिनी अॅपवर बंदी घालण्याचा निर्णय घेतला.

दरम्यान, टिकटॉकच्या एकूण जागतिक व्यवसायापैकी ३० टक्के व्यवसाय भारतात होत असल्याचा अंदाज आहे. त्यामुळे बंदी कायम राहिल्यास टिकटॉकला मोठ्या आर्थिक नुकसानीचा सामना करावा लागू शकतो. त्या पार्श्वभूमीवर टिकटॉकच्या व्यवस्थापनाने केंद्र सरकारच्या निर्णयाविरोधात न्यायालयीन लढाई लढण्याची तयारी सुरू केली आहे. तसेच त्यासाठी देशातील मोठ्या कायदेतज्ज्ञांना न्यायालयात उतरवण्याची तयारी कंपनीने केली आहे.

त्यासाठी देशाचे माजी अॅटॉर्नी जनरल राहिलेल्या मुकुल रोहतगी यांना वकिलपत्र घेण्याची विनंती टिकटॉकने केली होती. दरम्यान, भारत सरकारविरोधात चिनी अॅपसाठी न्यायालयात उभा राहणार नाही, असे स्पष्टपणे सांगत मुकुल रोहतगी यांनी टिकटॉकचे वकीलपत्र घेण्यास नकार दिला.

“भारत सरकारने बंदी घातलेल्या चिनी अ‍ॅपच्या बाजूने मी खटला लढणार नाही”, असं म्हणत मुकुल रोहतगी यांनी टिकटॉकची बाजू कोर्टात मांडण्यास नकार दिला. “चिनी अ‍ॅपसाठी भारत सरकारविरोधात मी लढणार नाही”, असं रोहतगी म्हणाले. वृत्तसंस्था एएनआयने याबबातचं वृत्त दिलं आहे.

 

News English Summary: For this, Tiktok had requested former Attorney General Mukul Rohatgi to get a letter of attorney. Meanwhile, Mukul Rohatgi, who has made it clear that he will not stand in court for the Chinese app against the Indian government, refused to take Tiktok’s plea.

News English Title: Mukul Rohatgi Refuses To Appear For Tiktok Against Government Of India Says He Wont Appear For The Chinese App News Latest Updates.

मुकुल रोहतगी यांच्याकडून टिकटॉकचे वकीलपत्र घेण्यास नकार