7th Pay Commission | केंद्रीय कर्मचारी एकीकडे आठव्या वेतन आयोगाच्या शिफारशींची वाट पाहत आहेत. तर दुसरीकडे कर्मचारीही वर्षाच्या पहिल्या सहामाहीसाठी डीए अर्थात महागाई भत्त्याच्या प्रतीक्षेत आहेत. खरं तर वर्षाच्या पहिल्या सहामाहीत म्हणजेच जानेवारी ते जून या कालावधीतील महागाई भत्त्याबाबत निर्णय होणार आहे.
आत्तापर्यंतचा पॅटर्न
आत्तापर्यंतचा पॅटर्न पाहता साधारणपणे दरवर्षी मार्चमध्ये निर्णय घेतला जातो. होळीच्या सुमारास सरकार त्याची घोषणा करते. त्यामुळे यंदा भत्त्यात वाढ करण्याची घोषणा होळीपूर्वी होण्याची शक्यता आहे. 14 मार्च 2025 रोजी देशभरात होळीचा सण साजरा करण्यात येणार आहे. त्यामुळे होळीपूर्वी मंत्रिमंडळाच्या बैठकीत निर्णय होण्याची शक्यता वर्तवली जात आहे.
डीए किती वाढणार?
केंद्र सरकार महागाई भत्त्यात 3 ते 4 टक्क्यांनी वाढ करू शकते. तसे झाल्यास केंद्रीय कर्मचाऱ्यांचा भत्ता ५७ टक्क्यांपर्यंत पोहोचेल. ऑक्टोबर 2024 मध्ये केंद्रीय मंत्रिमंडळाने जुलै च्या सहामाहीसाठी केंद्रीय कर्मचारी आणि पेन्शनधारकांना महागाई भत्ता आणि महागाई सवलतीचा अतिरिक्त 3 टक्के हप्ता मंजूर केला होता.
मूळ वेतनाच्या आधारे हा भत्ता दिला जातो
यापूर्वी हा भत्ता ५० टक्के होता. केंद्रीय कर्मचाऱ्यांना वर्षातून दोनवेळा सरकार भत्ता देते, हे लक्षात घेतले पाहिजे. हे सहामाही आधारावर ठरवले जाते. मूळ वेतनाच्या आधारे हा भत्ता दिला जातो. सातव्या वेतन आयोगाच्या शिफारशींनुसार ही तरतूद केली जाते.
