TCS Share Price | टीसीएस म्हणजेच टाटा कन्सल्टन्सी सर्व्हिसेस लिमिटेड कंपनीच्या शेअर्समध्ये जबरदस्त तेजी पाहायला मिळत आहे. गुरुवारी टीसीएस कंपनीने आपले डिसेंबर 2023 तिमाहीचे आर्थिक निकाल जाहीर केले होते. म्हणून आज या कंपनीच्या शेअर्समध्ये मोठ्या प्रमाणात खरेदी पाहायला मिळत आहे.
डिसेंबर 2023 तिमाहीत टीसीएस कंपनीचा निव्वळ नफा 8.2 टक्के वाढला आहे. डिसेंबर 2023 तिमाहीत टीसीएस कंपनीचा निव्वळ नफा मागील वर्षीच्या तुलनेत 8.2 टक्के वाढून 11,735 कोटी रुपये नोंदवला गेला आहे. तर या तिमाहीत टीसीएस कंपनीने 4 टक्के वाढीसह 60583 कोटी रुपये महसूल संकलित केला आहे.
टीसीएस ही आयटी कंपनी टाटा समूहाची ही सर्वात मोठी कंपनी आहे. या कंपनीने आपल्या तिमाही निकालांसोबतच शेअर धारकांना प्रति शेअर 27 रुपये लाभांश वाटप करण्याची घोषणा केली आहे. आज शुक्रवार दिनांक 12 जानेवारी 2024 रोजी टीसीएस स्टॉक 3.92 टक्के वाढीसह 3,881.90 रुपये किमतीवर ट्रेड करत आहे.
टीसीएस कंपनीच्या संचालक मंडळाने आपल्या पात्र शेअरधारकांना 18 रुपये प्रति शेअर विशेष लाभांश आणि 9 रुपये प्रति शेअर अंतरिम लाभांश वाटप करण्याची घोषणा केली आहे. टीसीएस स्टॉक गुरुवारच्या ट्रेडिंग सेशनमध्ये किंचित वाढीसह 3,726.70 रुपये किमतीवर क्लोज झाला होता. तिमाही आधारावर, टीसीएस कंपनीच्या महसुलात 1.5 टक्के वाढ नोंदवली गेली आहे. मात्र कंपनीचा निव्वळ नफा 2.5 टक्के घसरला आहे.
मागील तिमाहीत TCS कंपनीला एका कायदेशीर दाव्याची सेटलमेंट करण्यासाठी 958 कोटी रुपये द्यावे लागले होते. याचा परिणाम कंपनीच्या तिमाही कामगिरीवर झाला आहे. टीसीएस कंपनीच्या व्यवसायातील एकूण वाढ, संसाधने आणि उपयुक्तता, उत्पादन, जीवन विज्ञान आणि आरोग्य सेवा क्षेत्रातील चांगल्या कामगिरीमुळे कंपनीला फायदा झाला आहे.
डिसेंबर 2023 तिमाहीत कंपनीचे ऑपरेटिंग मार्जिन 0.5 टक्क्यांनी वाढून 25 टक्क्यांवर गेले आहे. तर कंपनीचा निव्वळ मार्जिन 19.4 टक्के होता. टीसीएस कंपनीच्या ऑर्डर बुकचा आकार सध्या 8 . 1 बिलियन डॉलर्स आहे. टीसीएस कंपनीने आपल्या शेअर धारकांना लाभांश वाटप करण्यासाठी 19 जानेवारी हा दिवस रेकॉर्ड डेट म्हणून जाहीर केला आहे. हा अंतरिम लाभांश आणि विशेष लाभांश शेअरधारकांना 5 फेब्रुवारी रोजी वाटप केला जाईल.
महत्वाचं : म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.
