वाडिया हॉस्पीटल बंद होऊ देणार नाही; शर्मिला राज ठाकरे देखील मैदानात

मुंबई: अत्यंत जुनं आणि लहान मुलांचं स्पेशलिस्ट असलेलं वाडिया रुग्णालय आता बंद होण्याच्या मार्गावर आहे, अशी माहिती रुग्णालय प्रशासनाने दिली. त्यामुळे वाडियामधील सर्व रुग्ण, कर्माचारी आणि आजूबाजूच्या नागरिकांनी नाराजी व्यक्त केली आहे. या पार्श्वभूमीवर आज लाल बावटा कामगार संघटनेकडून धरणे आंदोलन करण्यात येत आहे. विशेष म्हणजे या आंदोलनात महाराष्ट्र नवनिर्माण सेनेचे अध्यक्ष राज ठाकरेंच्या पत्नी शर्मिला ठाकरे यांनी उपस्थिती लावली.

“वाडिया रुग्णालय बंद झालं तर गोरगरिबांनी उपचारासाठी जायचं कुठे? महापालिका आणि संबंधित मंत्र्यांनी तातडीने बैठक घेऊन यावर तोडगा काढावा. काहीही झालं तरी हे रुग्णालय आम्ही बंद होऊ देणार नाही.” – सौ. शर्मिला राज ठाकरे. pic.twitter.com/ynUp8jQTkZ

— MNS Adhikrut (@mnsadhikrut) January 13, 2020

महापालिका अनुदानाची थकबाकी देत नसल्याने हॉस्पीटल बंद करावे लागणार असल्याचा दावा करणारे वाडिया प्रशासन आणि पालिकेने परस्परविरोधी दावे केले आहेत. मागील आठवड्यापासून वाडिया हॉस्पीटलने नव्या रुग्णांना दाखल करून घेण्याची प्रक्रियाही थांबवली आहे. अनुदानाअभावी वैद्यकीय सेवा आणि औषधांसह विविध सेवा देणाऱ्या व्हेन्डर्सना पैसे देता आलेले नाहीत. त्यामुळे रुग्णांसह, हॉस्पीटलच्या कर्मचाऱ्यांवरही ‘संक्रांत’ आली आहे.

“वाडिया हॉस्पीटल बंद झालं तर गोरगरीबांनी उपचारासाठी जायचं कुठे? महापालिका आणि संबंधित मंत्र्यांनी तातडीने बैठक घेऊन यावर तोडगा काढावा. काहीही झालं तरी हे हॉस्पीटल आम्ही बंद होऊ देणार नाही”, असा इशारा शर्मिला ठाकरे यांनी दिला आहे.

शिवसेना आमदार अजय चौधरी शिवडी मतदारसंघाचं प्रतिनिधित्व करतात. तर वाडिया रुग्णालय हे त्यांच्या मतदारसंघात परळ येथे आहे. वाडियातील कर्माचाऱ्यांच्या आंदोलनात शर्मिला ठाकरेंसोबत आमदार अजय चौधरीही सहभागी झाल्याने महाराष्ट्र नवनिर्माण सेना आणि शिवसेनेच्या स्थानिक कार्यकर्त्यांमध्ये चर्चा सुरु झाली होती. या आंदोलनाला मोठ्या प्रमाणात शिवसैनिक आणि महाराष्ट्र नवनिर्माण सेनेच्या कार्यकर्त्यांसह वाडिया रुग्णालयातील कामगार उपस्थित होते. लाल बावटा कामगार संघटनेकडून प्रकाश रेड्डी यांच्या नेतृत्वात वाडिया रुग्णालयाबाहेर ३ दिवसीय धरणे आंदोलन करण्यात येणार आहे.

Web Title:  Shivsena MLA Ajay Choudhary with Sharmila Raj Thackeray for Wadia Hospital Protest.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.