आंबेडकरी बांधवांनी केले विजयस्तंभाला अभिवादन

कोरेगाव भीमा : भीमानदीकाठावरील कोरेगाव भीमा जवळील ऐतिहासिक विजयस्तंभ मानवंदना सोहळ्यासाठी प्रशासन सज्ज झाले आहेत. मानवंदना सोहळ्यास महाराष्ट्रासह देशभरातून आज म्हणजे 1 जानेवारीला लाखो आंबेडकरी अनुयायी जमा झाले आहेत. दरम्यान, यावेळी विविध पक्ष, सामाजिक संघटनांच्यावतीने अभिवादन सभांचे आयोजन करण्यात आले आहे. मागील वर्षी झालेल्या हिंसाचाराच्या पार्श्वभूमीवर आणि त्यानंतर उसळलेला हिंसाचार लक्षात घेता पोलीस प्रशासनाकडून चोख बंदोबस्त करण्यात आला आहे.

कोरेगाव भीमाजवळ भीमानदीकाठी एक जानेवारी १८१८ मध्ये ब्रिटीश, महार रेजिमेंट आणि पेशवे यांच्यासैन्यात तुंबळ युद्ध झाले होते. यात महार बटालियनच्या ५०० शूरवीर सैनिकांनी पेशव्यांच्या ३०,००० सैनिकांचा पाडाव करुन विजय प्राप्त केला होता. दरम्यान, या युद्धात महार रेजिमेंटच्या अनेक शुरवीरांना हौताम्य आले. या धारातीर्थी पडलेल्या शूरवीर सैनिकांच्या शौर्याचे प्रतीक म्हणून इंग्रजांनी १८२२ मध्ये कोरेगाव भीमाजवळ भीमानदीकाठी हा त्यांच्या शौर्याचं प्रतीक म्हणून ‘विजयस्तंभ’ उभारला. १९२७ सालापासून डॉ. बाबासाहेब आंबेडकर या ठिकाणी मानवंदना देण्यासाठी येत होते. तेव्हापासून महाराष्ट्रासह देशभरातून आंबेडकरी बांधव एक जानेवारीला मोठ्या संख्येने मानवंदना देण्यासाठी येथे येऊ लागले असा इतिहास आहे.