मुंबई : मनसे अध्यक्ष राज ठाकरे यांची काल भांडुप येथे जाहीर सभा झाली. यावेळी देखील त्यांनी नरेंद्र मोदी यांना विशेष लक्ष केलं. दरम्यान, सभेला संबोधित करताना त्यांनी महागाई या सामान्यांशी निगडित विषयाला हात घालून भाजपला कोंडीत पकडलं. यावेळी त्यांनी गॅस सिलेंडरचे वाढलेले भाव यावरून भाजप नेत्यांचे पूर्वीचे व्हिडिओ जनतेला दाखवले.
परंतु सभे दरम्यान ईशान मुंबईचे खासदार किरीट सोमैया यांचा विषय निघाला आणि त्यावेळी राज ठाकरे यांनी रेल्वे प्लॅटफॉर्मची उंची मोजणारे खासदार आता अनेक वर्षांपासून गायब असल्याची टीका केली. त्यावेळी उपस्थितांना वाटलं आता किरीट सोमैयांचे देखील व्हिडिओ लागणार, पण राज ठाकरे यांनी लागेचच माझ्याकडे किरीट सोमैयांचे व्हिडिओ नाहीत आणि तसं ही ते काय बोलतात ते समजणार सुद्धा नाही असं म्हणत त्यांची अप्रत्यक्ष खिल्ली देखील उडवली आणि उपस्थितांमध्ये हशा पिकल्याचे पाहायला मिळाले.
