नवी दिल्ली : आधीच डॉलरच्या तुलनेत घसरत असलेल्या रुपयामुळे इंधनाच्या म्हणजे पेट्रोल-डिझेलच्या किमती प्रचंड वाढून महागाईचा भडका उडाला आहे आणि त्यात सामान्य माणूस पुरता होरपळून निघाला आहे. त्यात आता सीएनजी तसेच घरगुती वापरातील पीएनजी गॅस सुद्धा महागण्याची शक्यता वर्तविण्यात येत आहे. सामान्यांच्या घरगुती वापरासाठी असलेल्या पीएनजी गॅसची किंमत येत्या ऑक्टोबर महिन्यात ठरविण्यात येणार असल्याचे वृत्त आहे.
देशांतर्गत उत्पादन होणाऱ्या गॅसच्या मूळ दरामध्ये प्रतियुनिट १४ टक्के म्हणजे ३.५ डॉलरने तब्बल २५२ रुपये इतकी वाढ होण्याचा अंदाज वर्तविण्यात येत आहे. यापूर्वी मार्च २०१६ मध्ये गॅसच्या किमतीत सर्वाधिक ३.८२ डॉलरने वाढ झाली होती. दरम्यान, नैसर्गिक वायुची किंमत अमेरिका, कॅनडा, ब्रिटन आणि रशियातील सरासरी दराच्या आधारे दर सहा महिन्यांनी निश्चित करण्यात येतात. त्यात मागील काही दिवसांपासून रुपयाची किंमत घसरली असून त्याचा फटका थेट सामान्य ग्राहकांना बसणार आहे.
त्यामुळे पेट्रोल डिझेलच्या वाढलेल्या किमतींमुळे आधीच महागाईने होरपळलेल्या सामान्य माणसासाठी रोजच जगन सुद्धा मुश्किल होण्याची शक्यता आहे असच एकूण देशांतर्गत आणि आंतरराष्ट्रीय पातळीवरील चित्र दिसत आहे.
