आज मोदींचा वाराणसीत रोड शो

वाराणसी : पंतप्रधान नरेंद्र मोदी गांधीनगर आणि वाराणसी या दोन मतदारसंघांतून लोकसभा निवडणूक लढवत आहेत. उद्या वाराणसीतून ते उमेदवारी अर्ज दाखल करणार असून त्यापूर्वी आज ६ किलोमीटरचा भव्य रोड शो करणार आहेत. रोड शो नंतर मोदी दशाश्वमेध घाटावर गंगा आरतीत सामील होतील. त्यानंतर काशी विश्वनाथाचे दर्शन घेतील. तसेच ते पेरीस हॉटेलमध्ये वाराणसीच्या ३००० लोकांशी संवादही साधणार आहेत.

‘मैं यहां आया नहीं हूं, मुझे मां गंगे ने बुलाया है’ असे मोदी २०१४ च्या लोकसभा निवडणुकीवेळी वाराणसीत म्हणाले होते. आज पुन्हा एकदा ते वाराणसीत दाखल होणार आहेत. यावेळी भव्य रोड शो करत जोरदार शक्तीप्रदर्शन केले जाणार आहे. ते दुपारी २ वाजण्याच्या सुमारास बाबतपूर विमानतळावर दाखल होतील. तिथून बनारस हिंदू विश्वविद्यालयात जाऊन पंडित मदन मोहन मालवीय यांच्या प्रतिमेस वंदन करून त्यांच्या रोड शोला सुरुवात होईल.

पंतप्रधान मोदींच्या रोड शोमध्ये भाजपाचे दिग्गज नेते सामील होण्याची शक्यता आहे. लंकेहून दशाश्वमेध घाटापर्यंत होणाऱ्या या रोड शोमध्ये भाजपाचे राष्ट्रीय अध्यक्ष अमित शहा, केंद्रीय मंत्री नितीन गडकरी, निर्मला सीतारमण, सुषमा स्वराज, पियूष गोयल, योगी आदित्यनाथ, इत्यादी उपस्थित असणार आहेत.