नवी दिल्ली : विद्यमान निवडणूक आयुक्त सुनील अरोरा भारताचे नवे मुख्य निवडणूक आयुक्त असतील असं वृत्त आहे. विद्यमान मुख्य निवडणूक आयुक्त ओ पी रावत यांच्या जागी त्यांची नियुक्ती जाहीर करण्यात आली आहे. स्वतः निवडणूक आयोगाने सोमवारी या नियुक्तीची अधिकृत बातमी दिली आहे. पुढील महिन्यात म्हणजे दोन डिसेंबरला अरोरा अधिकृतपणे त्यांचा पदभार स्वीकारतील. विद्यमान मुख्य निवडणूक आयुक्त १ डिसेंबर रोजी पूर्ण होणार आहे.
अरोरा हे १९८० च्या बॅचचे राजस्थान केडरचे आयएएस अधिकारी आहेत. मागील वर्षी म्हणजे ३१ ऑगस्ट २०१७ रोजी त्यांची निवडणूक आयुक्त पदावर नियुक्ती करण्यात आली होती. दरम्यान, विधी मंत्रालयाने काल म्हणजे सोमवारी त्यांच्या नियुक्तीला केंद्र सरकारकडून अधिकृत मंजुरी मिळाल्यानंतर अखेरच्या परवानगीसाठी तो राष्ट्रपती भवनात पाठवण्यात आला आहे. लवकरच त्याची अधिकृत घोषणा करण्यात येईल विधी मंत्रालयाने स्पष्ट केले आहे.
६२ वर्षीय अरोरा यांनी केंद्र सरकारच्या माहिती व प्रसारण विभागाचे सचिव आणि कौशल विकास आणि उद्योजकता मंत्रालयाचे सचिव अशा महत्वाच्या पदावर काम केले आहे.
