रुद्रप्रयाग: लोकसभा निवडणुकीच्या प्रचाराची सांगता होताच पंतप्रधान नरेंद्र मोदींनी केदारनाथाचं दर्शन घेतलं आणि त्याचे थेट प्रक्षेपण देशभरातील वृत्त वाहिन्यांवर होईल याची देखील दक्षता घेतल्याचे पाहायला मिळाले. मोदींनी मंदिराच्या गाभाऱ्यात जाऊन विशेष पूजा केली. यानंतर मोदी केदारनाथमध्ये ध्यान करणार आहेत. मोदींचा उत्तराखंड दौरा दोन दिवसांचा आहे. यानंतर ते सोमवारी (१९ मे) बद्रिनाथला जातील.
आज सकाळी मोदी उत्तराखंडला पोहोचले. त्यानंतर तिथून ते केदारनाथमध्ये दाखल झाले. मोदींचा मागील ५ वर्षांमधला हा चौथा केदारनाथ दौरा आहे. मोदींनी मंत्रोच्चरात विशेष पूजा केली. पुजाऱ्यांनी त्यांच्या गळ्यात रुद्राक्षाची माळ घातली आणि चंदनाचा टिळा लागला. त्यानंतर पंतप्रधानांनी मंदिरात बराच काळ साधना केली. मोदींनी मंदिराला प्रदक्षिणा घालत उपस्थित भाविकांना अभिवादनही केलं.
दरम्यान ७व्या टप्प्यातील प्रचार संपला असून उद्या मतदान प्रक्रिया पार पडणार आहे. मात्र त्यानंतर घेतलेली मौनी पत्रकार परिषद चांगलीच चर्चेत आली. परंतु त्यानंतर देखील प्रसार माध्यमांच्या चर्चेत राहण्यासाठी सकाळपासून मंदिरात बसून ‘देवा मला पास कर’ असं अभ्यास न करता देवाकडे रडगाणं गाणाऱ्या विद्यार्थ्यांसारखी त्यांची अवस्था झाल्याचे पाहायला मिळत आहे. त्यापेक्षा अभ्यास उत्तम केला असता तर ही वेळच आली नसती याचा त्यांना विसर पडला आहे.
