मुंबई : खाजगी कोचिंग क्लासेसचे मालक आणि राज्याचे शिक्षणमंत्री विनोद तावडे यांच्यामध्ये मोठया प्रमाणात आर्थिक देवाणघेवाण झाल्याने खाजगी शिकवणीबाबतचा मसुदा तयार असून देखील तो मंत्रालयात केवळ धूळखात पडून असल्याचा थेट आरोप एनसीपीचे नेते व माजी मंत्री अनिल देशमुख यांनी जाहीर पत्रकार परिषदेत केला आहे. तसेस याकडे शिक्षणमंत्री विनोद तावडे जाणूनबुजून दुर्लक्ष करत असून यामध्ये मुख्यमंत्र्यांनी लक्ष घालून खाजगी शिकवणी मसुद्याला तात्काळ मंजुरी द्यावी, अशी मागणी देखील अनिल देशमुख यांनी केली.

गुजरात येथील सुरतमधील कोचिंग क्लासेसमध्ये भीषण आग लागण्याची दुर्दैवी घटना घडली. यामध्ये तब्बल २० ते २२ लहान मुलांचा होरपळून मृत्यू झाला. त्यामुळे देशात खळबळ उडाली. महाराष्ट्रात तब्बल १ लाख १० हजाराच्यावर खाजगी कोचिंग क्लासेस आहेत. त्यामध्ये मुंबईत ३० ते ३५ हजार कोचिंग क्लासेस आहेत, ज्यांचे फायर ऑडिट देखील होत नाही. तसेच अचानक आग लागली तर आपत्कालीन समयी बाहेर पडायला देखील जागा नाही. विशेष म्हणजे या क्लासेसवर कोणतेही निर्बंध नाही. कोणत्याही सोयी-सुविधा उपलब्ध नाहीत, असा गंभीर आरोपही अनिल देशमुख यांनी केला. सुरतसारखी घटना महाराष्ट्रात किंवा मुंबईत घडू शकते. दुर्दैवाने अशी कोणती दुर्दैवी घटना घडली तर उपाययोजना करण्याची सोय राज्य शासनाकडे नाही असा आरोपही अनिल देशमुखांनी केला.

कोचिंग क्लासेसचे मालक व विनोद तावडेंमध्ये मोठी आर्थिक देवाणघेवाण: राष्ट्रवादीचा आरोप