सत्ता होती तेव्हा गोट्या खेळत होता का? इम्तियाज जलील यांचा पंकजा मुंडेंना टोला

औरंगाबाद: पक्षांतर्गत निर्माण झालेली खदखद आणि ‘माधव’ सूत्राच्या भोवती फिरणारी राजकीय अपरिहार्यता यातून सोमवारी औरंगाबाद येथे पंकजा मुंडे यांच्या नेतृत्वाखाली उपोषण आंदोलनास जलसमस्यांचे आवरण देण्यात भाजपच्या नेत्यांना यश आल्याचे दिसून आले. हे उपोषण गोपीनाथ प्रतिष्ठानच्यावतीने घेण्याचे पूर्वी पंकजा मुंडे यांनी जाहीर केले होते. त्यानंतर भाजपच्या नेत्यांनी पक्षाच्यावतीने हे उपोषण असल्याचे सांगितले आणि सोमवारी विरोधी पक्षनेते देवेंद्र फडणवीस, प्रवीण दरेकर यांच्यासह केंद्रीय राज्यमंत्री रावसाहेब दानवे, पक्षाचे सरचिटणीस सुजीतसिंह ठाकूर आदींनी उपोषणात सहभाग नोंदविला.

‘मराठवाडा दुष्काळमुक्त करण्यासाठी आम्ही सत्तेत असतानाच हाती घेतलेल्या योजना पुढे घेऊन जा, त्याचे आम्ही समर्थन करू; पण त्यास खोडा घालण्याचा प्रयत्न केला, तर भाजप नेत्या पकंजा मुंडे यांच्या नेतृत्वाखाली रस्त्यावरून लढाई करू,’असा इशारा विरोधी पक्षनेते देवेंद्र फडणवीस यांनी महाविकास आघाडी सरकारला दिला.

दरम्यान, विरोधकांनी मात्र या उपोषणावर टीका करताना भारतीय जनता पक्षाच्या नेत्यांना लक्ष केलं आहे. इम्तियाज जलील म्हणाले, “राज्यात पाच वर्ष सत्ता होती. तेव्हा काय गोट्या खेळत होता का, त्यावेळी का या गंभीर प्रश्नांसाठी तुम्ही काही केलं नाही. सत्ता असताना काही केलं नाही, मग आता कशाला नौटंकी करता.” “तुम्ही औरंगाबादमध्ये एकत्र आला आहात, आम्ही एवढे मुर्ख नाही किंवा जनता एवढी मुर्ख नाही. उद्या तुमचे समर्थक तुम्हाला प्रश्न विचारतील की जेव्हा सत्तेत होता तेव्हा का केलं नाही, सत्ता गेल्यावर नौटंकी कशाला”, असंही इम्तियाज जलील म्हणाले.

Web Title:  MIM MP Imtiyaz Jaleel criticised on BJP leader Pankaja Munde in Aurangabad.