गोव्याचे मुख्यमंत्री मनोहर पर्रीकर उपचारासाठी दिल्लीला रवाना, मुख्यमंत्रीपद सोडणार?

पणजी : गोव्याचे मुख्यमंत्री मनोहर पर्रीकर यांच्या प्रकृती कारणास्तव सध्या गोव्यातील राजकारणात मोठ्या राजकीय घडामोडी घडताना दिसत आहेत. मुख्यमंत्री मनोहर पर्रीकर उपचारासाठी आज सकाळीच दिल्लीला रवाना झाले. त्यांना एम्समध्ये दाखल करण्यात येणार आहे. पर्रीकर ६ सप्टेंबरला अमेरिकेतून उपचार घेऊन परतले. मागील ७ महिन्यांपासून आजाराने त्रस्त असलेल्या मनोहर पर्रीकर यांनी गोव्याचे मुख्यमंत्रीपद सोडण्याची इच्छा व्यक्त केल्याचं सूत्रांनी सांगितलं.

बुधवारीच त्यांना पणजीतील रुग्णालयात प्रकृती खालावल्याने दाखल करण्यात आलं होतं. आज सकाळीच ते एम्समध्ये उपचार घेण्यासाठी दिल्लीला रवाना झालेत. तर पुढील उपचारासाठी ते अमेरिकेला जाण्याची शक्यता व्यक्त केली जातेय. उपचारासाठी पर्रीकर आतापर्यंत ३ वेळा अमेरिकेत जाऊन आलेत. पंतप्रधान नरेंद्र मोदी आणि भाजप अध्यक्ष अमित शहा हे पर्रीकर यांच्या संपर्कात असल्याचं सांगण्यात येतंय.

त्यामुळे लवकरच भाजपची उच्चस्तरीय टीम गोव्याला जाऊन आमदारांचे मत जाणून घेणार आहे आणि त्यानंतरच मनोहर पर्रीकर यांचा उत्तराधिकारी घोषित केला जाईल असं म्हटलं जात आहे.