मुंबई: महाराष्ट्र विधानसभा निवडणुकीसोबतच हरियाणातील विधानसभा निवडणुकीसाठी मतदान झालं आहे. मतदान संपल्यानंतर विविध संस्थांनी या निवडणुकांच्या निकालाबाबतचे अंदाज व्यक्त केले आहेत. महाराष्ट्रात पुन्हा एकदा भाजप आणि शिवसेनेचं सरकार येईल, असा अंदाज सर्वच संस्थांच्या एक्झिट पोलमधून वर्तवण्यात आला आहे. परंतु हरियाणाबाबत एका संस्थेनी वर्तवलेल्या अंदाजाने भारतीय जनता पक्षाला धक्का बसला आहे.
हरियाणा विधानसभा निवडणुकीत कोणत्याही एका पक्षाला बहुमत मिळणार नाही, असा अंदाज इंडिया टुडे-माय एक्सिसच्या एक्झिट पोलमधून वर्तवण्यात आला आहे. विधानसभेच्या एकूण ९० जागा असलेल्या हरियाणात भारतीय जनता पक्षाला ३२ ते ४४ जागा मिळतील असा अंदाज या एक्झिट पोलने वर्तवला आहे. तर काँग्रेसला ३० ते ४२ जागा मिळतील, असं या एक्झिट पोलमधून समोर आलं आहे. त्यामुळे देशभरात सुसाट निघालेला भारतीय जनता पक्षाचा विजयरथ हरियाणात अडखळणार का, हे पाहावं लागेल.
२०१४ मध्ये विधानसभा निवडणुकीमध्ये भारतीय जनता पक्षाला ४७ जागा मिळाल्या होत्या. बहुमत मिळाल्याने सरकार बनविले होते. विभाजनाचे इनेलोला मोठे नुकसान होऊ शकते. २०१४ मध्ये इनेलोला १९ जागा मिळाल्या होत्या. सोमवारी दाखविलेल्या एक्झिट पोलमध्ये भारतीय जनता पक्षाला ७५ जागा मिळण्याची शक्यता वर्तविण्यात आली होती.
सर्व्हेमध्ये भारतीय जनता पक्षाला ३३ टक्के मते मिळण्याची शक्यता आहे. तर काँग्रेसला ३२ टक्के आणि जेजेपीला १४ टक्के मते मिळण्याची शक्यता आहे. आज तकच्या सर्व्हेनुसार हरियाणामध्ये कोणत्याही एका पक्षाला बहुमत मिळणार नाही. यामुळे त्रिशंकू स्थिती निर्माण होऊ शकते.
