नागपूर: मशिदीवरील भोंगे बंद करा; सेनेची 'तात्पुरती' भूमिका...मनसेची कायमची आहे

नागपूर : परीक्षेच्या काळात मिशिदीवरचे लाऊड स्पिकर बंद ठेवण्यात अशी मागणी शिवसेनेच्या युवा नेत्याने केलीय. नागपूर जिल्ह्याचे युवा सेनाप्रमुख विक्रम राठोड यांनी ही मागणी केलीय. त्यासाठी त्यांनी गृहमंत्री अनिल देशमुख आणि जिल्हाधिकाऱ्यांना एक पत्र लिहिलंय. त्यात ही मागणी करण्यात आलीय. परीक्षेचा हा काळ विद्यार्थ्यांसाठी अतिशय महत्त्वाचा असतो. त्यांच्या भविष्यासाठी हे महत्त्वाचे दिवस असल्यामुळे हा निर्णय घेण्यात यावा अशी मागणी त्यांनी केलीय.

परीक्षेच्या काळात कुटुंबांमध्ये टी.व्ही. आणि रेडिओही बंद ठेवतात. असं असताना दिवसातून ५ वेळा नमाज पठण केलं जातं. त्यामुळे त्याच्या आवाजाने विद्यार्थ्यांना त्रास होण्याची शक्यता आहे. त्यामुळे या काळात हे लाऊड स्पिकर्स बंद ठेवण्यात यावे अशी विनंतीही त्यांनी केलीय. राज्यात महाआघाडीचं सरकार आल्यामुळे त्याची चर्चा सुरू झाली. शिवसेनेच्या शिष्टमंडळाने नागपूरचे जिल्हाधिकारी रविंद्र ठाकरे यांना या मागणीचं निवदेन दिलंय.

दरम्यान, महाराष्ट्र नवनिर्माण सेनेचे अध्यक्ष यांची ही जुनीच मागणी असल्याचं त्यांनी याआधीच स्पष्ट केलं आहे. औरंगाबाद दौऱ्यावर आलेले असताना राज ठाकरे प्रसार माध्यमांशी संवाद साधताना म्हणाले होते की, मी कधीच माझी भूमिका बदललेली नाही. पाकिस्तानी कलाकारांना विरोध हा पूर्वीपासूनच होता. त्यांना हाकलून देण्यातही आमचीच भूमिका महत्त्वाची होती. मशिदीवरील भोंगे बंद केले पाहिजेत हा मागणी आम्ही अनेक वर्षांपासून करतोय. जे स्वतःला हिंदुत्त्ववादी म्हणत होते. त्यांनीतरी असे कधी केले आहे का? असा सवाल मनसे प्रमुख राज ठाकरे यांनी केला होता.

तसेच आम्ही फक्त झेंडा बदलला आहे. आमची भूमिका तीच कायम आहे. राजकारणात झालेली पोकळी भरुन काढण्यासाठी आम्ही काही केलेले नाही, असे स्पष्ट करत धर्माला हात लावाल तर हिंदू म्हणून अंगावर जाईन, असा इशारा राज ठाकरे यांनी दिला होता.पक्षाचे धोरण आणि झेंडा बदलल्यानंतर राज ठाकरे हे प्रथमच मराठवाडा दौऱ्यावर आले होते.

Web Title: Story Ban on loudspeakers in mosques Nagpur Shivsena Party leader wrote a letter to home Minister Anil Deshmukh.