Railway Ticket Booking | प्रवाशांचे कोणत्याही प्रकारचे हाल होऊ नये आणि प्रवाशांना प्रत्येक सुविधेचा पुरेपूर लाभ उचलता यावा यासाठी नवनवीन प्रणाली आणल्या गेल्या आहेत. आजच्या घडीला प्रवाशाला तिकीट काउंटरवरून तसेच ऑनलाइन पद्धतीने अगदी सहजपणे तिकीट काढता येते. परंतु काही व्यक्तींना एक सामान्य प्रश्न उद्भवतो तो म्हणजे ऑनलाइन आणि तिकीट काउंटरवरील तिकिटामध्ये नेमका काय फरक असतो. या दोन्ही तिकिटांमध्ये स्वस्त तिकीट नेमके कोणते. आज आपण या सर्व गोष्टींबद्दल माहिती जाणून घेणार आहोत.
ऑनलाइन तिकिटे महाग असतात :
काउंटरवर जाऊन काढलेले तिकीट हे ऑनलाईन पद्धतीने काढलेल्या तिकिटापेक्षा स्वस्त असते. म्हणजेच ऑनलाइन पद्धतीने काढलेले तिकीट प्रवाशाला महाग पडते. आता ऑनलाईन तिकिटे एवढी महाग का असतात याविषयी जाणून घेऊया.
ऑनलाइन तिकिटे महाग का असतात :
ऑनलाइन पद्धतीने काढलेले तिकीट महाग का असते याचे उत्तर खुद्द रेल्वे मंत्र्यांनी राज्यसभेत दिले आहे. जे प्रवासी ऑनलाइन पद्धतीने तिकीट बुक करतात त्यांना थेट आयआरसीटीसीच्या वेबसाईटवरून तिकीट बुक करावे लागते. यामध्ये प्रवाशांकडून व्यवहार शुल्क आणि सुविधा शुल्क आकारले जाते आणि म्हणूनच रेल्वे तिकिटांचे ऑनलाईन भाडे जास्त असते. ऑनलाइन तिकिटाची सर्व माहिती केंद्रीय रेल्वेमंत्री अश्विनी वैष्णव यांनी दिली आहे.
त्यांच्या म्हणण्याप्रमाणे IRCTC प्रवाशांना ऑनलाईन तिकीट देण्यासाठी बराच खर्च करते. तिकीट इन्फ्रास्ट्रक्चरची देखभाल यांसारख्या गोष्टींसाठी IRCTC सुविधा शुल्का करण्याचा प्रयत्न करते. यामध्ये बँक ट्रांजेक्शन चार्जचा देखील समावेश होतो असे केंद्रीय रेल्वेमंत्री अश्विनी वैष्णव यांनी सांगितले आहे.
प्रवाशांचा वेळ त्याचबरोबर वाहतूक खर्चात होते मोठी बचत :
IRCTC वेबसाईटवरून ऑनलाईन तिकीट बुक करणे हा पर्याय प्रवाशांसाठी फायदेशीर ठरला आहे. रेल्वेचे तिकीट दर कमी असल्यामुळे रेल्वेला कायम गर्दी असते. अशावेळी बहुतांश प्रवासी स्वतःचे आरक्षण तिकीट काढून घेतात. आरक्षण काउंटरवर भली मोठी लाईन पाहायला मिळते. अशावेळी ऑनलाइन पद्धतीने तिकीट काढण्याची मुभा मिळाल्यानंतर चटकन तिकीट बुक होते त्याचबरोबर वाहतुकीचा खर्च आणि वेळेची देखील मोठी बचत होते.
