बिईंग ह्युमन संस्थेला मुंबई पालिकेकडून नोटीस.

मुंबई : मुंबई पालिकेकडून सलमान खान ची संस्था ‘बिईंग ह्युमन’ ला नोटीस बजावण्यात आली आहे. सलमानच्या या संस्थेला काळ्या यादीत टाकण्याची महापालिकेची तयारी असल्याचे समजते.

‘बिईंग ह्युमन’ संस्थेला वांद्रे येथे प्रकल्प मंजूर होऊन सुद्धा सवलतीच्या दरातील डायलिसिस युनिट अजून न बसविण्यात आल्याने मुंबई महापालिकेने ही नोटीस पाठवल्याचे समजते.

प्रत्येक महिन्याला १०,००० डायलिसिस प्रक्रिया पार पाडण्यासाठी मुंबई महापालिकेने डिसेंबर २०१६ मध्ये बारा डायलिसिस सेंटर सुरु करण्याचा निर्णय घेतला होता. तो प्रत्यक्षात न उतरल्याने महापालिकेने ‘बिईंग ह्युमन’ ला अखेर कारणे दाखवा नोटीस बजावली आहे.

‘बिईंग ह्युमन’ संस्था आणि मुंबई महापालिकेत झालेल्या करारानुसार ‘बिईंग ह्युमन’ संस्था या सेंटर साठी कर्मचारी वर्ग आणि सेंटर साठी लागणाऱ्या सोयीसुविधा पुरवणार होती तर महानगरपालिका या सेंटरसाठी जागा पुरविणार होती.

परंतु अजूनही परिस्थिती जैसे थे असल्याचे निदर्शनास आल्याने अखेर मुंबई महापालिका प्रशासनाने बॉलिवूड अभिनेता सलमान खान याची संस्था ‘बिईंग ह्युमन’ ला कारणे दाखवा नोटीस बजावली आहे.