नवी दिल्ली : उन्नाव सामूहिक बलात्कारपीडितेचा रात्री उशिरा दिल्लीतील सफदरजंग रुग्णालयात मृत्यू झाला. पाच जणांनी पीडितेला जिवंत पेटवून दिलं होतं. यात ती ९० टक्के भाजली होती. सफदरजंग रुग्णालयाच्या प्रवक्त्यांनी पीडितेचा मृत्यू झाल्याच्या वृत्ताला दुजोरा दिला आहे. उन्नावमध्येही सामूहिक बलात्कार पीडितेच्या अंगावर पेट्रोल ओतून जाळून ठार मारण्याचा प्रयत्न केला होता. त्यामुळं देशातील महिलांच्या सुरक्षेचा प्रश्न ऐरणीवर आला होता. पीडितेला तातडीनं जिल्हा रुग्णालयात दाखल करण्यात आलं होतं. ती ९० टक्के भाजली होती. तिची प्रकृती गंभीर असल्याचं सांगण्यात आलं होतं.

तिच्यावर गेल्यावर्षी बलात्कार करणाऱ्या दोन आरोपींपैकी एकाला दहा दिवसांपूर्वी जामीन मिळाला होता. तर या प्रकरणातील दुसरा आरोपी फरार आहे. गुरुवारी सकाळी पाच जणांनी तिच्यावर हल्ला करून तिला पेटवून दिले होते. नंतर तिला जखमी अवस्थेत लखनौ येथे आणि नंतर तेथून दिल्लीतील सफदरजंग रुग्णालयात दाखल करण्यात आले. दिल्ली वाहतूक पोलिसांनी तिला विमानतळावरून तातडीने रुग्णालयात नेण्यासाठी विनाअडथळा हरित मार्गिका उपलब्ध करून दिली होती.

सफदरजंग रुग्णालयातील बर्न अ‍ॅण्ड प्लास्टिक सर्जरी विभागाचे प्रमुख डॉ. शलभकुमार यांनी सांगितले की, “पीडितेला वाचविण्यासाठी सर्वतोपरी प्रयत्न केले. मात्र तिला वाचवू शकलो नाही. संध्याकाळी तिची प्रकृती अत्यंत नाजूक झाली होती. रात्री १०.१० वाजता तिला हृदयविकाराचा झटका आला. आम्ही उपचार सुरू केले आणि तिला वाचविण्याचे संपूर्ण प्रयत्न केले. मात्र, रात्री ११.४० वाजता तिचे निधन झाले.”

उन्नाव बलात्कार पीडितेचा अखेर दिल्लीतील सफदरजंग रुग्णालयात मृत्यू