मुंबई: सुधारित नागरिकत्व कायदा (सीएए) आणि राष्ट्रीय नागरिक सूची (एनआरसी) यावरून देशभरात प्रचंड वादंग सुरू असताना महाराष्ट्र नवनिर्माण सेनेचे अध्यक्ष राज ठाकरे यांनी बांगलादेशी, पाकिस्तानी घुसखोरांना देशाबाहेर हाकलण्याची भूमिका घेतली आहे. घुसखोरांविरोधात मनसेच्या वतीनं महामोर्चाचं आयोजन करण्यात आलं आहे. मरिन लाइन्स येथील हिंदू जिमखाना येथून मोर्चाला सुरूवात होत असून, आझाद मैदानात राज ठाकरे कार्यकर्त्यांना संबोधित करणार आहे.
राज ठाकरे यांच्याकडून शक्तिप्रदर्शन केले जाणार असल्याने मोर्चा व आझाद मैदानावर होणा-या सभेच्या ठिकाणी कोणताही अनुचित प्रकार घडू नये, यासाठी पोलीस दक्ष आहेत. दक्षिण मुंबईतील पोलीस ठाण्यातील पोलिसांबरोबरच विभागीय अधिकारी, अंमलदार, दंगल नियंत्रण पथक, बीडीडीएस, वाहतूक पोलीस, राज्य राखीव दलाच्या जवानांना रविवार सकाळपासून तैनात करण्यात आले आहे. त्याशिवाय अतिरिक्त ६०० जवानांना पाचारण केले आहे.
मोर्चासाठी दोन ते तीन लाख जण येण्याची शक्यता मनसे पदाधिकाऱ्यांकडून व्यक्त होत आहे. यासाठी मुंबईतील आझाद मैदानात जय्यत तयारी करण्यात आली आहे. भव्य स्टेज उभारण्यात आला असून दोन लाख जणांसाठी आसनव्यवस्थाही करण्यात आली आहे.
Web Title: MNS Raj Thackeray Hindutva morcha at Mumbai against Pakistani and Bangaladeshi.
