मुंबई : सरकारच्या निर्णयानुसार मल्टिप्लेक्समध्ये बाहेरचे खाद्यपदार्थ नेता येणार आहेत आणि मल्टिप्लेक्स मालक या नियमाची अंमलबजावणी करत आहेत की नाही याचा मनसे स्वतः ६ ऑगस्टपासून रिअॅलिटी ‘कान’चेक करणार आहे.
केवळ सरकारच्या नियमाची अंमलबजावणी नव्हे तर न्यायालयाने या विषयावर ताशेरे ओढले असताना सुद्धा मल्टिप्लेक्स मालक नियमांची पायमल्ली तर करत नाहीत ना याची खात्री स्वतः मनसे मल्टिप्लेक्समध्ये जाऊन करणार आहे. जर रिअॅलिटी चेक मध्ये काही चुकीचं आढळल्यास तिथेच ‘कान’चेक करण्यात येईल असं मनसेकडून स्पष्ट करण्यात आलं आहे.
काही दिवसांपूर्वी मल्टिप्लेक्स मालकांनी मनसे अध्यक्ष राज ठाकरे यांची भेट घेऊन काही वेळ मागितला होता. त्या प्रमाणे तो पुरेसा वेळ सुद्धा देण्यात आला असून स्वतः सरकारने सुद्धा १ ऑगस्ट पासून नवीन नियमांची अंमलबजावणी करण्याचे आदेश दिले होते आणि बाहेरील खाद्य पदार्थ आत मध्ये घेऊन जाण्यास मान्यता देण्यात आली आहे.
