एनसीपीच्या भारती पवार आणि काँग्रेसचे प्रविण छेडा भाजपात, लोकसभेची उमेदवारी मिळणार?

मुंबई: नाशिक जिल्ह्यातील राष्ट्रवादीच्या नेत्या डॉ. भारती पवार आणि मुंबईतील काँग्रेसचे नेते प्रविण छेडा यांनी आज दुपारी मुख्यमंत्री देवेंद्र फडणवीस यांच्या उपस्थितीत भाजपात प्रवेश केला. भारती पवार व छेडा यांचे मुख्यमंत्री देवेंद्र फडणवीस यांनी भाजपचा झेंडा हातात देऊन स्वागत केले. भारती पवार या दिंडोरी लोकसभा मतदारसंघातून तर प्रविण छेडा हे ईशान्य मुंबईतून लोकसभेसाठी इच्छुक आहेत. या दोघांना लोकसभेची उमेदवारी मिळणार हे आता निश्चित मानले जात आहे.

नाशिक जिल्ह्यातील दिंडोरी लोकसभा मतदारसंघातून डॉ. भारती पवार या राष्ट्रवादी काँग्रेसकडून इच्छुक होत्या. मात्र, राष्ट्रवादीने त्यांना तिकीट दिले नाही. ज्येष्ठ आदिवासी नेते व दिवंगत माजी मंत्री ए. टी. पवार हे नेहमीच शरद पवारांसोबत राहिले. मात्र, एटी पवार यांच्या निधनानंतर कुटुंबात कौटुंबिक वाद सुरू झाले. भारती पवार आणि जिल्हा परिषदेच्या माजी अध्यक्षा जयश्री पवार या जावा- जावातून सध्या विस्तवही जात नाही. या कौटुंबिक वादाचा पक्षाला नुकसान होऊ नये म्हणून राष्ट्रवादीने पवार यांच्याऐवजी दुस-या उमेदवाराचा शोध घेतला. अखेर राष्ट्रवादीने दिंडोरीचे माजी आमदार व शिवसेनेचे नेते धनराज महाले यांना लोकसभेची उमेदवारी दिली.