#IPL २०१९: मुंबई इंडियन्सची चेन्नईवर मात; जेतेपदावर चौथ्यांदा नाव कोरले

हैदराबाद : भेदक गोलंदाजीच्या जोरावर मुंबई इंडियन्सने आयपीएलचे चौथ्यांदा जेतेपद पटकावले. मुंबईने चेन्नईपुढे विजयासाठी एकूण १५० धावांचे आव्हान ठेवले होते. वॉटसनचा अपवाद वगळता एकाही चेन्नईच्या फलंदाजाला मोठी खेळी साकारता आली नाही. त्यामुळे मुंबईला चौथ्यांदा आयपीएलचे जेतेपद पटकावता आले. मुंबईने अखेरच्या चेंडूवर फक्त एका धावेने रोमहर्षक विजय मिळवत जेतेपदावर नाव कोरले.

मुंबईच्या १५० धावांच्या आव्हानाचा पाठलाग करताना चेन्नईची चांगली सुरुवात झाली. पण कालांतराने त्यांनी ठराविक फरकाने फलंदाज गमावले. मात्र यावेळी अपवाद ठरला तो शेन वॉटसन. आतापर्यंत सातत्यपूर्ण कामगिरी न करू शकलेल्या वॉटसनने धडाकेबाज फटकेबाजी करत चेन्नईचे आव्हान जीवंत ठेवले होते. धावांचा पाठलाग करताना वॉटसनने अर्धशतक झळकावले. ही खेळी साकारताना वॉटसनला तब्बल तीनवेळा जीवदान मिळाले.