मुंबई : बिग बॉस मराठीच्या घरातून काल माधव देवचके बाहेर पडला. त्याला दिलेल्या विशेष अधिकाराने त्याने नेहाला पुढील आठवड्यासाठी सेफ केले. माधवच्या जाण्याने नेहा आणि शिवानीला मोठा धक्का बसला आहे. त्याच्या जाण्याने आता नेहा आणि शिवानीची काय योजना असेल? याकडे सर्वांचे लक्ष आहेच. मात्र ज्या क्षणाची प्रेक्षक वाट बघत होते तो क्षण आज पाहायला मिळणार आहे.
आज बिग बॉस मराठीच्या घरामध्ये अभिजीत बिचुकलेंची एंट्री होणार आहे. ‘अगर मैने एकबार कमिटमेंट करली तो मै खुदाकी भी नही सुनता’ या शब्दांत अभिजीत बिचूकलेंनी घरामध्ये एंट्री घेतली आणि सर्व सदस्य आश्चर्यचकित झाले. अभिजीत बिचुकलेंच्या एंट्रीने घरातील समीकरणं कशी बदलणार हे पाहणे रंजक असणार आहे.
नुकत्याच झालेल्या विकेंडच्या डावामध्ये घरातील स्पर्धक माधव देवचकेला घरातून बाहेर पडावं लागलं. माधवच्या जाण्यामुळे घरातील अनेकांना धक्का बसला आहे. त्यातच नेहा आणि शिवानी प्रचंड दु:खी झाल्याचं पाहायला मिळत आहे. मात्र या साऱ्यामध्ये घरातील सदस्यांना एक आनंदाची बातमी मिळणार आहे. कारण, घरातून बाहेर गेलेल्या अभिजीत बिचुकलेची घरात पुन्हा एण्ट्री होणार आहे.
बिग बॉसच्या घरातून बिचुकलेला २०१५मधील एका चेक बाऊन्स प्रकरणात अटक करण्यात आली . त्याला बिग बॉसच्या घरातून २१ जूनला सातारा पोलिसांनी अटक केली. या केसमध्ये २२ जूनला जामीनही मिळाला होता. पण, त्याच्या विरोधातील खंडणी प्रकरण समोर आले. त्यांनंतर बिचुकलेला साताऱ्याच्या प्रथम न्यायालयात हजर करण्यात आलं. यावेळी कोर्टाने त्याला दिलासा न दिल्याने त्याला तुरुंगात जावं लागले होते. अटक केल्यानंतर बिचुकलेने एका वृत्तवाहिनीला प्रतिक्रिया दिली होती की, मला बिग बॉस मराठीच्या घरातून बाहेर काढण्याचा हा कट होता. मी विधानसभेची निवडणूक लढवणार असल्याने हा राजकीय कट आखण्यात आला असल्याचे त्याने सांगितले होते.
