नागपूर अधिवेशन: शिवसेना आणि भाजपच्या दोन आमदारांमध्ये जोरदार हाणामारी

नागपूर: विधिमंडळाचं हिवाळी अधिवेशन सुरू असताना सभागृहात धक्कादायक प्रकार घडला आहे. शेतकरी प्रश्नावरून चर्चा सुरू असताना शिवसेना आणि भारतीय जनता पक्षाच्या आमदारांमध्ये थेट हाणामारी झाली आहे. शिवसेनेचे बुलडाण्याचे आमदार संजय गायकवाड आणि भारतीय जनता पक्षाचे आमदार अभिमन्यू पवार या दोघांमध्ये जोरदार हाणामारी झाल्याचं पाहायला मिळालं.

सभागृहात दोन आमदारांमध्ये थेट हाणामारी झाल्याने मोठा गोंधळ उडाला. त्यानंतर सत्तारूढ पक्षाकडून जयंत पाटील आणि भास्कर जाधव आमदारांना समजावत आहेत. तर भाजपकडून आशिष शेलार आणि गिरीश महाजन हे भारतीय जनता पक्षाच्या आमदारांना आवरण्याचा प्रयत्न करत आहेत.

तत्पूर्वी, ‘समोरची लोकं आपल्याला पावलोपावली अडचणीत आणण्याचा प्रयत्न करतील. पावलावर पाऊल टाकण्याऐवजी पायात पाय अडकवण्याची त्यांना सवय आहे.त्यामुळे सावध रहायला हवं’ असे आवाहन मुख्यमंत्री उद्धव ठाकरे यांनी केले. महाविकास आघाडीच्या बैठकीत ते बोलत होते. विधानभवनातील शिवसेनेच्या पक्ष कार्यालयात महाविकास आघाडीची बैठक पार पडली. यावेळी मुख्यमंत्र्यांसह शिवसेना, राष्ट्रवादी आणि काँग्रेसचे सर्व मंत्री आणि आमदार बैठकीला उपस्थित होते.

भारतीय जनता पक्षाने सामनातील बातमी दाखवत शेतकऱ्यांना हेक्टरी २५ हजार रुपये देण्याची मागणी केली. महत्त्वाचं म्हणजे सभागृहातही भारतीय जनता पक्षाने आक्रमक पवित्रा घेतला. यावेळी शिवसेनेचे आमदारही आक्रमक झाले. दोन्ही पक्षाचे आमदार इतके आक्रमक झाले की दोन आमदारांमध्ये चक्क हाणामारी झाली.

Web Title:  Shiv sena BJP MLAs Fight in Vidhan sabha During Winter session second day MLA Abhimanyu Pawar and MLA Sanjay Gaikwad Fight Each Other.