संतापजनक! मोदींची थेट छत्रपती शिवाजी महाराजांशी तुलना करणारं पुस्तक भाजपकडून प्रकाशित

नवी दिल्ली: ‘आज के शिवाजी नरेंद्र मोदी’ पुस्तकाचं भाजपकडून दिल्लीत प्रकाशन करण्यात आलं आहे. भाजपचे प्रदेशाध्यक्ष मनोज तिवारी, प्रभारी श्याम जाजू, माजी खासदार महेश गिरी या नेत्यांच्या उपस्थितीत हे प्रकाशन करण्यात आले.

पंतप्रधान नरेंद्र मोदी यांची छत्रपती शिवाजी महाराजांशी तुलना करणारं हे पुस्तक दिल्ली भाजपच्या पक्ष कार्यालयात प्रकाशित झालं आहे. मात्र, या पुस्तकामुळे वाद निर्माण होण्याची शक्यता आहे. कारण शिवाजी महाराजांची तुलना मोदींशी करणं अनेकांना पटणारं नाही.

मराठा क्रांती मोर्चानेही या पुस्तकाला विरोध दर्शवला आहे. छत्रपती शिवाजी महाराजांबरोबर कोणाचीही तुलना होऊ शकत नाही. आपण प्रधानमंत्री आहात आपला सन्मान आहे. परंतु छत्रपती शिवाजी महाराजांबरोबर तुलना कधीही शक्य नाही या घटनेचा निषेध करतो, असं समन्वयक विनोद पाटील म्हणाले आहेत. दरम्यान, भाजपच्या या पुस्तक प्रकाशनामुळे विरोधीपक्ष आक्रमक होण्याची शक्यता आहे.

यापूर्वी भारतीय जनता पक्षाच्या नेते मंडळींनी अनेक महापुरुषांशी आणि देवी-देवतांशी पंतप्रधान नरेंद्र मोदी यांची तुलना केली आहे. उत्तर प्रदेशचे मुख्यंमत्री योगी आदित्यनाथ यांनी मोदींची तुलना थेट छत्रपती शिवाजी महाराजांशी केली होती, तर भाजपच्या प्रवक्त्यांपासून ते देशपातळीवरील नेत्यांनी मोदी आम्हाला भगवान विष्णू समान असल्याचं म्हटलं होतं. मात्र नुकतीच राज्यघटनेचे शिल्पकार भारतरत्न डॉ. बाबासाहेब आंबेडकर यांचा ६ डिसेंबरला ६३वा महापरिनिर्वाण दिन पार पडला तेव्हा देखील अशक्य असलेल्या तुलना भारतीय जनता पक्षातील नेत्यांनी सुरु केल्या होत्या.

तसंच वक्तव्य भारतीय जनता पक्षाचे राज्यसभेवरील खासदार अमर साबळे एका मुलाखतीत केलं होतं. त्यावेळी साबळे म्हणाले की, भारतीय जनता पक्षामध्ये ओबीसी समाजातील नेत्यांवर अन्याय होत असल्याच्या उलटसुलट चर्चा सुरु होती. त्याच पार्श्वभूमीवर ओबीसी वर्गाला भारतीय जनता पक्षात आजिबात डावललं जात नसल्याचे भारतीय जनता पक्षाचे राज्यसभा खासदार अमर साबळे यांनी म्हटले होते. तसेच ओबीसी वर्गाला पंतप्रधान नरेंद्र मोदी यांनी संविधानिक अधिकार मिळवून दिला आहे आणि त्यामुळे नरेंद्र मोदी हे ओबीसींचे डॉ. बाबासाहेब आंबेडकर आहेत, अशा शब्दांत खासदार साबळे यांनी मोदींचे कौतुक केले होतं.

Web Title:  BJP Party inaugurated book Aaj Ke Shivaji Narendra Modi.