मुंबईः जवळपास ७० हजार कोटी रुपयांच्या सिंचन घोटाळाप्रकरणी लाचलुचपत प्रतिबंधक विभागाने (एसीबी) अजित पवारांना क्लीन चिट दिली आहे. मुंबई हायकोर्टाच्या नागपूर खंडपीठात हे प्रतिज्ञापत्र सादर करण्यात आलं आहे. एसीबीकडून सिंचन विभागाशी संबंधित २६५४ निविदांची चौकशी केली जात असून, त्यापैकी ४५ प्रकल्प हे विदर्भ पाटबंधारे विकास महामंडळाचे आहेत.
नागपूर खंडपीठासमोर २ जनहित याचिका २०१२ साली दाखल करण्यात आल्या होत्या. त्यानंतर २१२ निविदा प्रकरणी उघड चौकशी पूर्ण करण्यात आली असून त्यापैकी २४ केसेसची नोंदणी झाली आहे. एसीबीने आज नागपूर मध्ये मुंबई हायकोर्टाच्या खंडीपाठात प्रतिज्ञापत्र सादर केले आहे. त्यात अजित पवार पूर्णपणे निर्दोष असल्याचं म्हटलंय.
अमरावती जिल्ह्यातील भातकुलीचा निम्न पेढी प्रकल्प तसेच चांदूर बाजारचा रायगड नदीवरील प्रकल्प, दर्यापूरचा वाघाडी तसेच जीगाव सिंचन प्रकल्पाच्या टेंडर प्रक्रियेत भ्रष्टाचार झाल्याचा आरोप एका जनहित याचिकेच्या माध्यमातून झाला होता. नागपूर खंडपीठात ही याचिका दाखल झाली होती. त्यावर भारतीय जनता पक्षाने राज्यात हा कथित गैरव्यवहार उचलून धरला होता. भारतीय जनता पक्षाची सत्ता असताना, अजित पवार यांच्या विरोधात ट्रकभर पुरावे असल्याचा दावा भारतीय जनता पक्षाच्या ज्येष्ठ नेत्यांनी केला होता. परंतु, या प्रकरणात अजित पवार निर्दोष असल्याचा निर्वाळा खुद्द एसीबीनेच कोर्टापुढे दिला आहे.
Web Title: NCP Senior Leader Ajit Pawar Praises Yuva Sena Chief Aaditya Thackeray.
