ईशान्य मुंबई: जोरदार शक्तिप्रदर्शन करत संजय पाटील यांचा उमेदवारी अर्ज दाखल

मुंबई : किरीट सोमैया आणि शिवसेनेच्या वादात ईशान्य लोकसभा मतदारसंघाची निवडणूक चुरशीची होणार यात शंका नाही. उद्धव ठाकरे यांच्यावर गैरव्यवहाराचे वैयक्तिक आरोप केल्याने किरीट सोमैया यांचा पत्ता कट करत भाजपाने मुलुंडचे नगरसेवक मनोज कोटक यांना ईशान्य मुंबईतून उमेदवारी जाहीर केली आहे. तर दुसरीकडे राष्ट्रवादीने माजी खासदार संजय दीना पाटील यांना आधीच उमेदवारी जाहीर केल्याने त्यांनी प्रचारात देखील आघाडी घेतल्याचे पाहायला मिळाले.

दरम्यान, काल संजय दीना पाटील यांनी जोरदार शक्तिप्रदर्शन करत उमेदवारी अर्ज दाखल केला. यावेळी त्यांच्यासोबत स्थानिक काँग्रेस आणि मनसेचे पदाधिकारी देखील हजर होते. ईशान्य मुंबई लोकसभा मतदारसंघात भाजप आणि शिवसेनेमधील अंतर्गत कलह मनोज कोटक यांचा मार्ग अवघड करू शकतो असं म्हटलं जात आहे. दरम्यान, अल्पसंख्यांक आणि मराठी मतदारांवर संजय पाटील यांची मदार असणार असून इतर भाषिकांनी देखील त्यांना चांगला प्रतिसाद दिल्यास ते पुन्हा २००९ मधील इतिहास रचतील अशी शक्यता वर्तविण्यात येत आहे.

ईशान्य मुंबईच्या पट्यात संजय दीना पाटील यांच्यासाठी आक्रमक कार्यकर्त्यांची मोठी फळी असल्याने त्याचा त्यांना चांगला फायदा होऊ शकतो. दरम्यान, अर्थशक्ती मध्ये दोन्ही बाजू म्हणजे भाजप आणि राष्ट्रवादी सारखेच तुल्यबळ असल्याचं म्हटलं जात आहे. त्यात त्यांना स्थानिक मनसे पदाधिकारी आणि त्याच्या मतदाराची चांगली साथ मिळाल्यास त्यांचा विजय सुकर होऊ शकतो असं राजकीय विश्लेषकांना वाटत आहे. तर मनोज कोटक यांची सर्वात मोठी शक्ती ही मुलुंड पट्यातील गुजराती मतदारांवरच अवलंबून असणार आहे यात वाद नाही. तसेच स्वतः किरीट सोमैया आणि ईशान्य मुंबई पट्यातील भाजप आमदार त्यांच्यासाठी काम करणार की छुप्यापद्धतीने त्यांच्या विरोधात ते पाहावं लागणार आहे.

Disclaimer: म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.