जम्मू-काश्मीर : जम्मू काश्मीर मधील महत्वाच्या समजल्या जाणाऱ्या कारगिल येथील पहाडी विकास परिषदेच्या २६ जागांसाठी पार पडलेल्या निवडणुकीत काँग्रेस आणि नॅशनल कॉन्फ्रेन्स पार्टीने सरशी मारली आहे, तर भाजपला केवळ एका जागेवर समाधान मानावं लागलं आहे.
विशेष म्हणजे ही संपूर्ण निवडणूक बॅलेट पेपरने पार पडली होती. निवडणुकीतील एकूण निकालात नॅशनल कॉन्फ्रेस पार्टीने सर्वाधिक म्हणजे एकूण १० जागा जिंकत पहिल्या क्रमांकाचा पक्ष बनला आहे. तर दुसरीकडे काँग्रेस एकूण ७ जागा जिंकून दुसऱ्या क्रमांकावर आहे आणि पीडीपी’ला २ तर भाजपाला केवळ एका जागेवर समाधान मानावे लागले आहे. विशेष म्हणजे ५ जागांवर केवळ अपक्ष विजयी झाले आहेत.
एकूणच बॅलेट पेपरने पार पडलेल्या या निवडणुकीत भाजपची अवस्था अपक्षांपेक्षा सुद्धा बिकट झाली आहे. या निवडणुकीत एकूण ७० टक्के मतदानाची नोंद झाली होती आणि एकूण ९९ उमेदवार रिंगणात होते. मतमोजणी अंती फारूक अब्दुल्लांच्या नॅशनल कॉन्फ्रेस पार्टीने पदुम, तेसोरू, पोएन, सिलमो, थांगसम, परकाचिक, कारगिल टाऊन आणि चुली सिंबु या १० जागांवर विजय संपादन केला आहे. तर काँग्रेसने पशकुम, भीमभाट, चोसकोर, खांग्रल, शकर, बारू, खारशह या ७ जागांवर विजयश्री संपादन केला आहे.
