नाशिकमध्ये वसंत गीते समर्थकांमध्ये फूट, भाजप'ला रामराम करून राष्ट्रवादीत प्रवेश: भुज'बळ' पावर

नाशिक : नाशिक भाजपमध्ये मोठी फूट पडण्याची शक्यता आहे. भाजपचे महत्वाचे पदाधिकारी व वसंत गीते समर्थक भाजपला रामराम ठोकून राष्ट्रवादी पक्षात प्रवेश करणार आहेत. या पदाधिकाऱ्यांचा प्रवेश निश्चित झाल्याचे वृत्त आहे. माजी उपमुख्यमंत्री छगन भुजबळ जामिनावर बाहेर आल्यानंतर या घडामोडींना जोर आला आहे. भाजप’मधील पक्ष फुटी नाशिकमधून सुरु होण्याची शक्यता वर्तविली जात आहे.

या संबंधित स्थानिक युवा मोर्चाचे शहर उपाध्यक्ष अजिंक्‍य गिते, बाळा निगळ, निवृत्ती इंगोले, जय कोतवाल, धनाजी लगड, आकाश तेजाळे हे प्रमुख पदाधिकारी आणि त्यांच्या समर्थकांची नुकतीच एक बैठक आयोजित करण्यात आली होती. त्यावेळी भाजपमध्ये होणारी खदखद सर्वच पदाधिकाऱ्यांनी बोलून दाखविली. संबंधित सर्व पदाधिकारी हे वसंत गीते यांचे समर्थक समजले जातात. मनसेतून निवडणुकीच्या तोंडावर बाहेर पडत भाजपमध्ये प्रवेश करणारे हे पदाधिकारी अल्पवधीतच भाजपमध्ये सुद्धा अन्याय होत असल्याचं जाहीरपणे बोलत आहेत. त्यामुळे हा वसंत गीते यांच्यासाठी सुद्धा धक्का मानला जात आहे.

संबंधित सर्व पदाधिकारी हे राष्ट्रवादीच्या संपर्कात असून ते लवकरच भाजपला सोडचिट्टी देऊन राष्ट्रवादी मध्ये प्रवेश करणार असून, त्यासाठी १ ऑगस्ट ही तारीख निश्चित झाल्याचे समजते. या पदाधिकाऱ्यांनी त्यासाठी जय्यत केली असून राष्ट्रवादीच्या प्रवेशावेळी शक्ती प्रदर्शन करण्याची योजना या पदाधिकाऱ्यांनी आखली आहे.

लोकसभा, विधानसभा आणि महापालिकेतील मोठ्या यशानंतर सुद्धा भाजप नाशिकमध्ये विशेष कामगिरी करू शकलेलं नाही. आजही भाजपला नाशिक स्मार्ट सिटीच्या नावाने मनसेच्या काळातील प्रकल्पांचाच आधार घ्यावा लागत असल्याने, त्याचे परिणाम आगामी निवडणुकीत भोगावे लागू शकतात असं म्हटलं जात.