मुंबई : महाराष्ट्र नवनिर्माण सेनेचे अध्यक्ष राज ठाकरे आज दुपारी मुबई महानगरपालिका आयुक्त अजोय मेहता यांची त्यांच्या कार्यालयात भेट घेणार आहेत. आज मुंबई महानगरपालिका मुख्यालयात दुपारी १.०० वाजता ही भेट होणार असल्याचे समजते. काही दिवसांपासून विविध प्रलंबित मागण्यांसाठी आझाद मैदानावर उपोषणास बसलेल्या शिक्षकांची सुद्धा ते भेट घेणार असल्याचे वृत्त आहे.
साधारण दुपारी दीडच्या सुमारास ते मुंबईतील आझाद मैदानात दाखल होतील असे समजते आहे. त्यानंतर आज सायंकाळी ५ वाजता जे. जे. स्कूल ऑफ आर्ट्सच्या सभागृहात रंगसम्राट रघुवीर मुळगांवकर यांच्या चित्रांच्या दिनदर्शिकेचे प्रकाशन करण्यात येणार असून या कार्यक्रमाला सुद्धा राज ठाकरे विशेष उपस्थिती दर्शवतील असे वृत्त आहे.
दरम्यान, आज मुंबई आझाद मैदान येथे राज्यभरातील शेतकरी तसेच आदिवासी सुद्धा विराट मोर्चा घेऊन दाखल होत आहेत. त्यांची सुद्धा राज ठाकरे भेट घेणार का हे पाहावं लागणार आहे. सध्या राज्यभर दुष्काळाचे भीषण सावट असताना राज्यकर्ते धर्म आणि नामांतराच्या राजकारणात मूळ विषयांना बगल देत आहेत असं एकूण वातावरण आहे.
