ठाणे : मुरबाडमध्ये शिवसेनेला जोरदार धक्का बसला आहे. मुख्यमंत्र्यांच्या उपस्थितीत शिवसेनेच्या दोन नगरसेविका, शहर पदाधिकारी आणि युवासेनेच्या अनेक कार्यकर्त्यांनी भाजपमध्ये प्रवेश केला आहे. त्यामुळे शिवसेनेत सुद्धा गळती सुरु झाली असून पुढे सुद्धा शिवसेनेला मोठे धक्के दिले जातील असा विश्वास स्थानिक नेत्यांनी बोलून दाखवला.
मुरबाड शहरातील शिवसेनेच्या दोन नगरसेविका साक्षी बाबू चौधरी आणि वैशाली रवीन्द्र शेळके यांच्या सहित शिवसेनेचे उपशहर प्रमुख बाबू चौधरी, रवींद्र शेळके, भारत वामन शेलार, अनिल सरनौबत तसेच युवासेनेचे सचिन बांगर, मुरबाड तालुका कुंभार समाज अध्यक्ष सचिन कुंभार, प्रकाश सोनावणे, कुणाल गोडांबे यांच्या सहित शेकडो कार्यकर्त्यांनी मुख्यमंत्री देवेंद्र फडणवीस यांच्या उपस्थितीत भाजपमध्ये प्रवेश केला आहे.
त्यामुळे शिवसेनेला हा मुरबाडमध्ये जोरदार धक्का भाजपकडून देण्यात आला आहे. पदवीधर मतदारसंघाची निवडणूक जवळ आली असताना शिवसेनेला हा धक्का बसला आहे. या वेळी मंचावर मुख्यमंत्र्यांसोबत खासदार कपिल पाटील, आमदार किसान कथोरे आणि शहरातील इतर प्रमुख पदाधिकारी उपस्थित होते.
