ओपिनियन पोल: छत्तीसगड, राजस्थान व मध्य प्रदेशात भाजप जोरदार धक्का बसणार?

नवी दिल्ली : या वर्षाअखेर छत्तीसगड, राजस्थान व मध्य प्रदेश या तीन राज्यात विधानसभा निवडणूक होणार आहेत. या तिन्ही राज्यात सध्या भाजपचे सरकार असले तरी आगामी विधानसभा निवडणुकीत भाजपला जोरदार धक्का बसून काँग्रेसला बहुमत मिळण्याची शक्यता वर्तविण्यात येत आहे.

एबीपी न्यूज आणि सी व्होटरनं एकत्रित केलेल्या या सर्वेक्षणात प्रथम दर्शनी हे निकाल दिसत आहेत. त्यानुसार लोकसभा निवडणुकीआधी भाजपला धक्का बसण्याची शक्यता असल्याचे या सर्वेक्षणात दिसत आहे. आगामी विधानसभा निवडणुकीत या तिन्ही राज्यातील मतदार काँग्रेसला हात देण्याची शक्यता शक्यता वर्तविण्यात आली आहे.

या ओपिनियन पोल नुसार मध्यप्रदेशात भाजपला ४० टक्के तर दुसरीकडे काँग्रेसला ४२ टक्के मतं मिळण्याचा अंदाज दर्शविण्यात आला आहे. मध्य प्रदेशात विधानसभेच्या एकूण २३० जागांपैकी ११७ जागा काँग्रेसला तर भाजपला १०६ जागांचा अंदाज वर्तविण्यात आला आहे. त्यामुळे आगामी निवडणुकीत शिवराज सिंह चौहान यांना धक्का बसण्याच भाकीत या ओपिनियन पोलमध्ये दिसत आहे.

दुसरीकडे छत्तीसगडमधील रमण सिंह यांच्या नैतृत्वाला देखील आगामी विधानसभा निवडणुकीत धक्का बसून काँग्रेस सत्तेत येईल असा अंदाज वर्तविण्यात आला आहे. त्यानुसार काँग्रेसला ४० टक्के मतं तर भाजपला ३९ मतं आणि इतर पक्षांना २१ टक्के मतं पडतील अंदाज वर्तविण्यात आली आहे. विधानसभेच्या एकूण ९० जागांपैकी काँग्रेसला ५४ जागा तर भाजपला ३३ जागा मिळतील, परंतु लोकसभेत मात्र छत्तीसगड भाजपला साथ देईल असा अंदाज आहे.

दुसरीकडे राजस्थानमध्ये भाजपचा धुव्वा उडण्याची शकता आहे. आगामी विधानसभा निवडणुकीत एकूण २०० जागांपैकी काँग्रेसला ५७ टक्के मतं मिळून ते १३० जागांवर विजय प्राप्त करतील. तर दुसरीकडे भाजपला ३७ टक्के मतं मिळून केवळ ५७ जागा हाताला लागतील असं अंदाज आहे. त्यामुळे या सर्वेक्षणानुसार भाजपला धोक्याचा इशारा मिळत आहे.