मुंबई : मुंबई सारखी श्रीमंत महापालिकेत सत्ता आणि राज्य व केंद्रातील भागीदार शिवसेना हा देशातील सर्वात श्रीमंत प्रादेशिक पक्ष ठरला आहे. एडीआर ने प्रसिद्ध केलेल्या आकडेवारीनुसार २०१६-१७ या आर्थिक वर्षात शिवसेनेला सर्वाधिक म्हणजे तब्बल २५.६५ कोटी रुपयांच्या देणग्या मिळाल्या आहेत. देशभरातील सर्व राजकीय पक्षांनी निवडणूक आयोगाला दिलेल्या माहितीच्या आधारावर एडीआरनं हा अहवाल प्रसिद्ध केला आहे.
मागील वर्षीचा म्हणजे २०१५-१६ चा श्रीमंत प्रादेशिक पक्षाचा मान सुद्धा शिवसेनेलाच मिळाला आहे. मागील आर्थिक वर्षात शिवसेनेला तब्बल ६१.१९ कोटी इतक मोठ्या देणग्या मिळाल्या होत्या. त्यात एकट्या व्हिडिओकॉन ग्रुपकडूनच भली मोठी देणगी मिळाल्याची माहिती इलेक्शन कमिशनच्या माहितीत उघड झालं होत. दुसरीकडे शिवसेनेनंतर क्रमांक लागतो तो आम आदमी पक्षाचा त्यांना एकूण २४.७५ कोटी इतकी देणगी मिळाली आहे.
सर्वात श्रीमंत प्रादेशिक पक्षांच्या यादीत पंजाबमधील शिरोमणी अकाली दल तिसऱ्या क्रमांकावर असून त्यांना २०१६-१७ या आर्थिक वर्षात १५.४५ कोटी इतकी देणगी मिळाली आहे. परंतु शिवसेना सर्वात श्रीमंत राजकीय पक्ष ठरला असला तरी, २०१५-१६6 च्या तुलनेत त्यांना यंदा मिळालेल्या देणग्यांच्या रकमेत ७० टक्क्यांची घसरण झाली आहे. कारण २०१५-१६ मध्ये शिवसेनेला ६१.१९ कोटी देणग्या मिळाल्या होत्या ज्यामध्ये व्हिडिओकॉनचा मोठा वाटा होता.
