मुंबई: दिल्ली ते गल्ली भारतीय जनता पक्षासोबत सत्तेत सामील असलेली शिवसेना भाजपवर टीका करण्याची एकही संधी सोडत नाही. त्यात पंतप्रधान नरेंद्र मोदी हे केंद्रस्थानी असतात. लोकसभा निवडणुकीच्या दृष्टीनं देशातलं सर्वात मोठं तसेच अत्यंत महत्त्वाचं राज्य असलेल्या यूपीत इतर स्थानिक मित्र पक्षांसह लोकसभा निवडणूक लढवण्याची तयारी शिवसेनेनं सुरू केल्याचे वृत्त प्रसार माध्यमांच्या कानावर आलं आहे. त्यासंबंधित लवकरच अधिकृत घोषणा शिवसेनेकडून केली जाण्याची शक्यता आहे.
महाराष्ट्रात स्थानिक राजकारण करणाऱ्या शिवसेनेनं यूपीत पक्षविस्तार करण्याचे ध्येय निश्चित केले आहे. तसेच आगामी लोकसभा निवडणुकीत देशभरात उमेदवार देण्याची तयारी शिवसेनेनं सुरू केल्याचे वृत्त आहे. त्यात विशेष करून उत्तर प्रदेश, बिहार, जम्मूमध्ये लोकसभा निवडणूकीवर विशेष लक्ष केंद्रित करण्याचा निर्णय घेण्यात आल्याचे वृत्त आहे. तसेच इतर राज्यांमध्ये सध्या शिवसेनेकडून स्थानिक मित्रपक्षांचा शोध सुरू आहे.
तसेच यूपीत भारतीय जनता पक्षाचे मित्र पक्ष आमच्या संपर्कात असल्याचा दावा सुद्धा खासदार संजय राऊत यांनी प्रसार माध्यमांशी बोलताना केला. दरम्यान, त्या स्थानिक पक्षांच्या मदतीनं यूपीत २५ जागांवर शिवसेना उमेदवार निश्चित करणार आहे असं समजते. त्यात सुहेलदेव भारतीय समाज पार्टीचे प्रमुख ओम प्रकाश राजभर यांच्यासोबत आमच्या अनेक बैठका झाल्याची माहिती त्यांनी प्रसार माध्यमांच्या प्रतिनिधींना दिली आहे.
