नवी दिल्ली : झेक रिपब्लिकमध्ये झालेल्या आंतरराष्ट्रीय स्पर्धेत गोल्डन गर्ल आणि धावपटू हिमा दासने सुवर्ण धमाकाच केला आणि देशाची शान जगभरात उंचावली आहे. कारण आता अजून एका सुवर्ण पदकाला गवसणी घातली आहे. हिमाने आता ४०० मीटर धावण्याच्या प्रकारात सुवर्ण पदक पटकावलं आहे. यापूर्वी हिमाने ४ सुवर्ण पटकावली आहेत. त्यामुळे आता तिच्या खात्यात एकूण ५ सुवर्ण पदकं झाली आहेत. भारतासाठी अशी भव्य कामगिरी करणारी ती पहिलीच धावपटू ठरली आहे.

झेक रिपब्लिकमध्ये झालेल्या आंतरराष्ट्रीय स्पर्धेत तिनं ४०० मीटर अंतर ५२.०९ सेकंदात पूर्ण करत सुवर्णपदकावर नाव कोरले आहे. याआधी तिने २०० मीटर धावण्याच्या स्पर्धेत ४ सुवर्णपदके पटकावली आहेत. त्यामुळे मागील वीस दिवसांत तिचं हे पाचवं सुवर्णपदक आहे.

दरम्यान, आसाममध्ये सध्या पूरपरिस्थिती आहे. त्यामुळे काही दिवसांपूर्वी हिमा दासने आपल्याला मिळणाऱ्या मानधनातून अर्धी रक्कम पूरग्रस्तांसाठी दान म्हणून दिली होती. तिच्या या निर्णयामुळे तिचे सर्वच स्तरातून कौतुक होत आहे.

अभिमानास्पद! गोल्डन गर्ल हिमा दासने जिंकले ५ सुवर्णपदक