अंबरनाथ : अंबरनाथमधील शिवसेनेच्या माजी नगरसेवकावल बलात्काराचा गुन्हा दाखल करण्यात आला आहे. तसंच याप्रकरणात त्याला अटकही करण्यात आली आहे. प्रधान पाटील असं या माजी नगरसेवकाचे नाव आहे. अंबरनाथमध्ये एका महिलेने शिवसेनेच्या माजी नगरसेवकावर गुरुवारी बलात्काराचा आरोप केल्याने खळबळ उडाली होती. त्यानंतर आज पोलिसांनी याची दखल घेत प्रधान पाटील याच्याविरुद्ध बलात्काराचा गुन्हा दाखल केला आहे. अंबरनाथच्या शिवाजीनगर पोलिसांनी प्रधान पाटील याला अटक केली आहे. याप्रकरणी आता पोलीस अधिक तपास करत आहेत. लवकरच या प्रकरणातील संपूर्ण माहिती समोर येईल.
दरम्यान एप्रिल २०१८ मध्ये एडीआर’ने प्रसिद्ध केलेल्या या अहवालात भारतातील ५१ खासदार आणि आमदारांवर महिला अत्याचाराचे गुन्हे दाखल असल्याचे उघड झाले होते. त्यात भारतीय जनता पक्ष आघाडीवर होता आणि त्यांच्या १४ लोकप्रतिनिधी, शिवसनेच्या ७ आणि ममता बॅनर्जींच्या तृणमूल काँग्रेसच्या ६ लोकप्रतिनिधीं विरोधात महिला अत्याचाराचे गुन्हे दाखल आहेत. त्यामुळे त्या अहवालानंतर सत्ताधारी आणि विरोधक दोघेही अडचणीत सापडले होते.
‘एडीआर’ म्हणजे असोसिएशन फॉर डेमोक्रॅटिक रिफॉर्म्सने प्रसिद्ध केलेल्या अहवालात महिलांविरोधातील गुन्ह्यांमध्ये विनयभंग, अपहरण, बलात्कार, वेश्या व्यवसायासाठी महिलांची तस्करी अशा गुन्ह्यांचा समावेश आहे असं स्पष्ट केलं आहे. एडीआरने संपूर्ण राज्यनिहाय आकडेवारी जाहीर केली होती. त्या आकडेवारीनुसार महाराष्ट्र पहिल्या क्रमांकावर आहे. देशातील एकूण ५१ खासदार आणि आमदारांपैकी महाराष्ट्रातील १२ खासदार आणि आमदारांवर महिला अत्याचाराचे गुन्हे दाखल आहेत. तर द्वितीय स्थानी पश्चिम बंगाल आहे. त्यात आता शिवसेनेच्या माजी नगरसेवकाने अजून एक भर टाकली आहे.
