बिहार निवडणुक | भाजपच्या महत्वाच्या नेत्यांना कोरोनाची लागण | प्रचारावर परिणाम

पाटणा, २४ ऑक्टोबर : बिहार विधानसभा निवडणुकांच्या प्रचारात रंगत आली असून राजकीय पक्षांकडून घोषणांचा पाऊस पडत आहेत. भाजपा, जयदूने आपल्या जाहीरनाम्यात मोठ्या घोषणा केल्यानंतर आता लालू प्रसाद यादव यांच्या राष्ट्रीय जनता दलानेही मोठ्या घोषणा करत, पक्षाचा जाहीरनामा प्रसिद्ध केला आहे. राजद नेते तेजस्वी यादव यांनी पत्रकार परिषद घेऊन, पक्षाचा जाहीरनामा प्रसिद्ध केला. ‘प्रण हमारा संकल्प बदलाव का’ असे नाव देण्यात आले आहे. या जाहीरनाम्यातही युवकांना केंद्र स्थानी ठेवण्यात आले आहे.

राजदच्या जाहीरनाम्यात 17 मुद्द्यांना स्थान देण्यात आले असून 10 लाख युवकांना नोकरी देण्याचा संकल्प तेजस्वी यादव यांच्या पक्षाने मांडला आहे. त्यासोबतच, शेती, शिक्षण याही मुद्द्यांना स्थान देण्यात आलंय. राजदच्या 16 पानी जाहीरनाम्यात सत्ता आल्यास पहिल्याच कॅबिनेटमध्ये 10 लाख युवकांना नोकरीसंदर्भात प्रक्रिया सुरू करण्यात येईल, असे म्हटले आहे.

दुसरीकडे बिहारच्या निवडणूक प्रचारादरम्यान भाजपला मोठा धक्का बसला आहे. भाजपचे बिहार प्रभारी आणि महाराष्ट्राचे माजी मुख्यमंत्री देवेंद्र फडणवीस यांनाही कोरोनाची लागण झाली आहे. यापूर्वी राज्याचे उपमुख्यमंत्री सुशील मोदी, पक्षाचे प्रवक्ते शाहनवाज हुसेन आणि माजी केंद्रीय मंत्री राजीव प्रताप रुडी यांना कोरोनाची लागण झाली आहे.

देवेंद्र फडणवीस यांनी त्यांच्या ट्विटरवरुन त्यांना कोरोनाचा संसर्ग झाल्याची माहिती दिली. त्यांनी लिहिले की, ‘लॉकडाऊनपासून ते सतत काम करत होते, परंतु कदाचित त्यांन थोडी विश्रांती घ्यावी ही देवाची इच्छा आहे. मी कोरोना पॉझिटिव्ह असल्याचे आढळले आहे आणि मी स्वत:ला क्वारंटाईन केले आहे. मी डॉक्टरांच्या सल्ल्यानुसार सर्व आवश्यक औषधे आणि उपचार घेत आहे.’

बिहारमधील भाजप नेत्यांना कोरोनाचा मोठा फटका बसला आहे. देवेंद्र फडणवीस यांच्यावर बिहार निवडणुकीची जबाबदारी होती. त्याच्या शिवाय सुशील मोदी, शाहनवाज हुसैन आणि राजीव प्रताप रुडी यांच्या सारख्या महत्त्वाच्या नेत्यांना ही कोरोनाची लागण झाल्याने याचा फटका निवडणूक प्रचारात बसणार आहे.

News English Summary: The BJP has suffered a major blow during the Bihar election campaign. BJP’s Bihar in-charge and former Maharashtra Chief Minister Devendra Fadnavis has also contracted corona. Earlier, state Deputy Chief Minister Sushil Modi, party spokesperson Shahnawaz Hussain and former Union Minister Rajiv Pratap Rudy were infected with the corona.

News English Title: Bihar Assembly Election 2020 BJP leaders corona positive during News Updates.