मुंबई : संजय दत्त म्हणजेच बॉलिवूडचे संजू बाबा आज ६० वर्षाचे झाले. अभिनेते सुनील दत्त व नर्गिस दत्त यांच्या पोटी संजय दत्त यांचा जन्म २९ जुलै १९५९ रोजी झाला. बॉलिवूड मध्ये संजय दत्त यांचं पदार्पण १९८१ मध्ये रॉकी ह्या चित्रपटातून झाले. संजय दत्त यांनी आपल्या पदार्पणानंतर अनेक हिट सिनेमे केले. १९८५ मधील नाम, १९८८ मधील जीते हैं शान से, मर्दो वाली बात, १९८९ मधील इलाका, हम भी इन्सान है आणि कानून अपना अपना असे अनेक ब्लॉकबस्टर सिनेमे त्यांनी त्या काळी प्रेक्षकांसाठी केले.
संजय दत्त यांना १९९१ मध्ये साजन साठी व १९९३ मध्ये खलनायक ह्या चित्रपटासाठी सर्वोत्कृष्ठ अभिनेता ह्या श्रेणीत नामांकन मिळाले. १९९९ मध्ये संजय दत्त यांना त्यांच्या वास्तव ह्या चित्रपटातील भूमिकेसाठी सर्वोत्कृष्ठ अभिनेत्याचे पुरस्कार मिळाले. २००३ मधील मुन्ना भाई एम. बी. बी. एस आणि २००६ मधील लगे राहो मुन्ना भाई मधील त्यांच्या भूमिकेला प्रेक्षकांकडून भरभरून प्रेम मिळाले. १९९३ मध्ये संजय दत्त यांना टाडा ऍक्ट च्या कल्मेखाली अटक करण्यात आले. अनेक वेळा जेल च्या फेऱ्या करून व त्या नंतर त्यांची उरलेली शिक्षा भोगून २०१६ मध्ये संजय दत्त यांची जेल मधून अखेर सुटका झाली.
२०१८ मध्ये रिलीज झालेल्या संजू ह्या चित्रपटाने संजू बाबा ह्यांच्या बद्दलची प्रेक्षकांमध्ये असलेली निगेटिव्ह इमेज पूर्णतः पुसुन काढली. आज संजू बाबा ह्यांच्या ६०व्या जन्मदिवशी त्यांनी आपल्या नवीन येणाऱ्या सिनेमा के.जी.एफ मधील आपला एक पोस्टर आपल्या सोशल मीडिया अकाऊंट’वर लाँच केला आहे व त्यांची आणखी एक येणारा चित्रपट प्रस्थानाम ह्याचा टिझर लाँच केला.
