डोंबिवली: लोकलमधून पडून तरुणीचा मृत्यू; खा. सुप्रिया सुळेंनी संसदेत विषय मांडला होता

मुंबई : मुंबई : डोबिवली लोकलच्या गर्दीने आणखी एका प्रवाशाचा जीव घेतला आहे. भरगच्च लोकलमधून पडल्याने एका २२ वर्षीय तरुणीचा दुर्दैवी मृत्यू झाला. चार्मी पासद असं मृत्यू झालेल्या तरुणीचं नाव आहे. डोंबिवली ते कोपर रेल्वे स्थानकांदरम्यान आज सकाळी ९ च्या सुमारास ही दुर्घटना घडली. दरम्यान, याच डोंबिवली कल्याणच्या लोकल संदर्भातील विषय राष्ट्रवादीच्या खासदार सुप्रिया सुळे यांनी संसदेत मांडून लोकांच्या समस्या सरकारने समजून घेऊन त्यांची गैरसोय टाळावी आणि फेऱ्या वाढवाव्या अशी विनंती देखील केली होती.

डोंबिवलीकडे जाणाऱ्या लोकलमधील गर्दीचा आणि गाड्यांच्या अनियमितपणाचा मुद्दा संसदेत मांडला. डोंबिवलीकडे जाणाऱ्या गाड्यांची संख्या वाढवावी अशी आग्रही मागणी यावेळी केली.

— Supriya Sule (@supriya_sule) December 3, 2019

आज सकाळी डोंबिवली रेल्वे स्थानकाहून ८. ५३ वाजताची सीएसएमटीकडे जाणारी जलद लोकल चार्मीने प्लॅटफॉर्म क्रमांक ५ वरून पकडली होती. गर्दी असल्याने तिला लोकल ट्रेनच्या दरवाज्यावर उभं राहण्यासाठी कशीबशी जागा मिळाली. तरी देखील ती आत शिरण्याचा प्रयत्न करत होती. मात्र, कोपर येथे रेल्वेच्या आतून गर्दीचा लोंढा आला आणि दरवाज्यावर उभ्या असलेल्या चार्मीचा तोल गेला.

ती डोंबिवली कोपरदरम्यान धावत्या लोकलमधून पडली. यामुळे तिच्या डोक्याला गंभीर जखमा झाल्या होत्या. तिला तात्काळ नजीकच्या रुग्णालयात दाखल करण्यात आलं. परंतु, तिथे तिला डॉक्टरांनी मृत घोषित करण्यात आले.

Web Title:  Young girl dies in Dombivali Local Rush