Gautam Adani | अदानी समूहाचा विदेशी फंडाशी असलेल्या कनेक्शनचा सेबी'कडून तपास सुरु, अडचणीत वाढ होणार

Gautam Adani | हिंडेनबर्गच्या अहवालानंतर गौतम अदानी समूहावर प्रश्नचिन्ह निर्माण झाले आहे. गेल्या काही महिन्यांपासून सिक्युरिटीज अँड एक्स्चेंज बोर्ड ऑफ इंडिया (सेबी) अदानी समूहावरील आरोपांची चौकशी करत आहे. आता सेबीने अदानी समूह आणि ब्रिटीश व्हर्जिन आयलँड्सचा निधीही आपल्या चौकशीच्या कक्षेत घेतला आहे. गल्फ एशिया ट्रेड अँड इन्व्हेस्टमेंट असे या फंडाचे नाव आहे.

अदानी समूह आणि फंडाच्या कनेक्शनची चौकशी
अदानी समूह आणि गल्फ एशिया ट्रेड अँड इन्व्हेस्टमेंट यांच्यातील संबंधांची सेबी चौकशी करत आहे, असे रॉयटर्सने सूत्रांच्या हवाल्याने म्हटले आहे. गेल्या महिन्यात फंडाच्या वेबसाईटवर दुबईतील व्यापारी नासिर अली शाबान अहली यांच्या मालकीची माहिती देण्यात आली होती. मात्र, आता ही वेबसाइट हटवण्यात आली आहे.

ऑर्गनाइज्ड क्राईम अँड करप्शन रिपोर्टिंग प्रोजेक्ट (ओसीसीआरपी) या शोध पत्रकारांच्या जागतिक नेटवर्कने रॉयटर्सला दिलेल्या आकडेवारीनुसार या फंडाने अदानी समूहाच्या कंपन्यांमध्ये गुंतवणूक केली आहे. आता चौकशीत सेबीला या फंडामागे नेमके कोण आहे आणि त्याचा अदानी समूहाशी काही संबंध आहे का, हे जाणून घ्यायचे आहे.

हिंडेनबर्गने केले गंभीर आरोप
अमेरिकेतील शॉर्ट सेलर फर्म हिंडेनबर्गने जानेवारीमहिन्यात अदानी समूहावर अनेक गंभीर आरोप केले होते. अदानी समूहाने शेअर्सच्या मूल्यांकनात फेरफार केल्याचा आरोप करण्यात आला होता. याशिवाय त्याने शेल कंपन्यांच्या माध्यमातून आपल्या लिस्टेड कंपन्यांमध्ये पैसे गुंतवले आहेत. या सर्व आरोपांवर अदानी समूहाने अनेकदा स्पष्टीकरण दिले आहे.

मात्र, या आरोपांमुळे अदानी समूहाचे शेअर्स आणि गौतम अदानी यांच्या वैयक्तिक संपत्तीत ऐतिहासिक घसरण झाली. त्यामुळे शेअर बाजारही अस्थिर झाला. हे प्रकरण सर्वोच्च न्यायालयात गेले आणि न्यायालयाच्या आदेशानंतर सेबी अदानी समूहावरील आरोपांची चौकशी करत आहे.

महत्वाचं : म्युच्युअल फंड आणि शेअर बाजारातील गुंतवणूक ही जोखमींवर आधारित असते. शेअर मार्केटमध्ये गुंतवणूक करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक नुकसानीस महाराष्ट्रनामा डॉट कॉम जबाबदार राहणार नाही.

News Title : Gautam Adani SEBI probing Adani group ties with gulf Asia fund says report 11 October 2023.